Viktar Šejman, fota photo.bymedia.net |
Padčas incydentu 4 lipienia ŭ Minsku pravaachoŭnyja orhany i słužby ratavańnia ź pieršych chvilin pracavali nieapieratyŭna. Takoje mierkavańnie vykazaŭ 7 lipienia Alaksandr Łukašenka na naradzie ab chodzie rasśledavańnia nadzvyčajnaha zdareńnia padčas śviatkavańnia Dnia niezaležnaści.
"Mnie časta zadajuć pytańnie, navošta ja tudy palez. Ja b hetaha nie zrabiŭ, kali b nie ŭbačyŭ, što sabralisia dziesiatki karet chutkaŭ dapamohi, i jany taptalisia na miescy ź mihałkami, pakul ja tudy nie pryjšoŭ", — cytujuć A. Łukašenku aficyjnyja krynicy. Bo "heta pryciahvała ŭvahu ludziej i ryzykavała vylicca ŭ paniku", - skazaŭ jon. Kiraŭnik dziaržavy nahadaŭ, što dla mašyn chutkaj dapamohi była vydzielena svabodnaja vulica, i ŭklučanyja mihałki byli zališnija.
Jak zaznačajuć aficyjnyja krynicy, źviartajučysia da dziaržsakratara Rady biaśpieki Viktara Šejmana, A. Łukašenka skazaŭ: "Nie dumaju, što Vy pavinny zastavacca na hetaj pasadzie paśla incydentu. Vy vinavatyja, pierš za ŭsio! Vy pavodle daručeńnia prezidenta nie adzin hod, a dziesiać hadoŭ arhanizujecie padobnyja mierapryjemstvy. I ničoha nie zrabili!"
A. Łukašenka padkreśliŭ, što maje vielmi šmat pytańniaŭ, na jakija chacieŭ by pačuć adkazy.
"Chaču padkreślić: ja bačyŭ usio. Na žal, bolš, čym luby siłavy ministr", — skazaŭ kiraŭnik dziaržavy.
Jak paviedamlałasia raniej, u vyniku vybuchu nočču padčas śviatočnaha hała-kancerta pa miedycynskuju dapamohu ŭ staličnyja kliniki źviarnulisia 54 čałavieki. Raniej było aficyjna zajaŭlena, što ŭsie paciarpiełyja byli evakujavany ź miesca vybuchu na praciahu 20 chvilin.