Dziaviaty źjezd Sajuzu palakaŭ Biełarusi.
Pieršyja kroki na pasadzie staršyni SPB Borys źbirajecca zrabić u nakirunku ŭzmacnieńnia arhanizacyi, a taksama jaje aŭtarytetu.
Anžalika Borys była abranaja novaj staršynioj niepryznavanaha biełaruskimi ŭładami Sajuzu palakaŭ na dziaviatym źjeździe arhanizacyi, jaki adbyŭsia ŭ Horadni.
Za jaje prahałasavali 99 delehataŭ z 189 prysutnych. Jejny apanent — Miečysłaŭ Jaśkievič, jaki da hetaha kiravaŭ Sajuzam palakaŭ, nabraŭ 85 hałasoŭ.
Za Anžaliku Borys hałasuje Andžej Pačobut.
Padčas abmierkavańnia kandydaturu Borys padtrymali hanarovy staršynia Sajuzu palakaŭ Tadevuš Havin, a taksama Andžej Pačobut, žurnalist polskaj «Haziety Vyborčaj». Abodva zaznačyli, što ŭ Biełarusi kryzisnaja sytuacyja i dobryja ŭmovy dla taho, kab arhanizacyja, narešcie, była pryznanaja, dziela hetaha, maŭlaŭ, na pasadu staršyni patrebnaja mocnaja asoba.
Anžalika Borys.
«Pieršaje, na što budzie skiravana ŭvaha na novaj pasadzie, — zajaviła Svabodzie Anžalika Borys, — heta ŭzmacnieńnie arhanizacyi, a taksama jaje aŭtarytetu». Siarod pieršych krokaŭ Borys taksama planuje zaniacca lehalizacyjaj arhanizacyi — vieści razmovu ź biełaruskimi ŭładami adnosna jaje rehistracyi. Voś što adkazała Borys na pytańnie Svabody ab mahčymym abjadnańni dvuch isnujučych Sajuzaŭ palakaŭ.
«Biełaruskija ŭłady musiać źmianić staŭleńnie da našaj arhanizacyi, pakolki i ja, i siabry našaje arhanizacyi źŭlajemsia hramadzianami Biełarusi, a taksama padatkapłatnikami. I toje, što ŭłady robiać vyhlad niby nas niama — heta staŭleńnie musić źmianicca. Kali hetaha nie adbudziecca, to my budziem pracavać u tym samym režymie, jak pracavali dahetul.
Ciapier užo były staršynia Sajuzu palakaŭ Miečysłaŭ Jaśkievič paśla vybaraŭ padziakavaŭ delehatam, jakija addali svoj hołas za jaho, a taksama hałasavali suprać.
Miečysłaŭ Jaśkievič.
«Naš źjezd jašče raz zaśviedčyŭ, što my isnujem na demakratyčnych umovach i kožny maje prava zrabić svoj vybar. Hetym istotna adroźnivajecca naša arhanizacyja ad inšych. A tamu ŭsim dziakuju i zaprašaju da dalejšaj pracy».
Siarod haściej dziaviataha źjezdu Sajuzu palakaŭ prysutničaŭ ambasadar Polščy ŭ Biełarusi Konrad Paŭlik. Na pytańnie Svabody ŭ spravie lehalizacyi niepryznavanaha biełaruskimi ŭładami Sajuzu palakaŭ zaznačyŭ, što razmovy na hety kont ź biełaruskimi ŭładami pravodziacca pastajanna.
Ambasadar Polščy ŭ Biełarusi Konrad Paŭlik.
«My čakali, kali projdzie źjezd arhanizacyi. Heta čarhovy etap. Staŭleńnie Varšavy ŭ hetym pytańni zastajecca niaźmiennym — my chočam lehalizacyi Sajuzu palakaŭ Biełarusi. My taksama chočam vieści pieramovy pra majomaść Sajuzu palakaŭ, pra Polskija damy ŭ Biełarusi».
Z 2005 hodu ŭ Biełarusi isnujuć dva Sajuzy palakaŭ. Adzin ź ich padtrymlivajecca biełaruskimi ŭładami, a druhi nie pryznajecca ŭładami, ale maje padtrymku ad uładaŭ Polščy.
