ES schilny padtrymać patrabavańni Niderłandaŭ adnosna Pahadnieńnia ab asacyjacyi z Ukrainaj, navat kali heta nie zadavolić sajuźnikaŭ Ukrainy va Uschodniaj Jeŭropie.
Pra heta paviedamlaje ahienctva Reuters sa spasyłkaj na jeŭrapiejskich dypłamataŭ, piša «JeŭraPraŭda».
«Staŭki zanadta vysokija. U rešcie rešt, kali pahadnieńnie ab asacyjacyi nie budzie ratyfikavanaje hałandcami, heta budzie parazaj i dla Ukrainy, i dla ES, i stanie pieramohaj Rasii», — skazaŭ adzin z dypłamataŭ.
«Heta doraha, ale varta taho. Na dadzienym etapie, abo heta, abo ničoha» — adznačyŭ inšy dypłamat.
«Pa hetaj pryčynie dypłamaty čakajuć zhody, navat kali i niekatoryja ŭrady — asabliva blizkija sajuźniki Ukrainy va Uschodniaj Jeŭropie — zaniepakojenyja i razdražnionyja hałandskimi patrabavańniami», piša Reuters, dadajučy, što pasły ES abmiarkoŭvajuć prapanovy Niderłandaŭ u paniadziełak.
Prajekt dakumienta, padrychtavanaha Niderłandami dla abmierkavańnia krainami ES i ź jakim aznajomiłasia Reuters, «nie ŭtrymlivaje abaviazacielstvaŭ dla ES i krain-siabroŭ pa zabieśpiačeńni harantyj kalektyŭnaj biaśpieki abo inšaj vajennaj dapamohi abo sadziejničańnia Ukrainie.»
Akramia taho, u dakumiencie skazana, što hramadzianam Ukrainy nie dajecca «prava pražyvać i svabodna pracavać u ES. Siarod prapanoŭ taksama pałažeńnie ab tym, što pahadnieńnie «nie praduhledžvaje dadatkovaj finansavaj padtrymki» Ukrainy z boku ES.
U prajekcie dakumienta havorycca, što baraćba z karupcyjaj va Ukrainie źjaŭlajecca klučom da naładžvańnia bolš ciesnych suviaziaŭ pamiž Kijevam i błokam.
Raniej paviedamlałasia, što patrabavańni ŭrada Niderłandaŭ nie majuć metaj źmieny tekstu Pahadnieńnia ab asacyjacyi — havorka idzie ab asobnym dakumiencie, jaki pavinien mieć abaviazkovy charaktar. Kali krainy ES pahodziacca na ŭmovy Niderłandaŭ, premjer Mark Rute nie stanie prapanoŭvać parłamientu admovicca ad ratyfikacyi ŭkrainskaha pahadnieńnia.
Jak viadoma, u listapadzie bolšaść deputataŭ u parłamiencie Niderłandaŭ zaćvierdzili rašeńnie dać premjer-ministru Marku Rute bolš času dla praviadzieńnia pieramovaŭ ź jeŭrapiejskimi kalehami adnosna Pahadnieńnia ab asacyjacyi Ukraina—ES.
Patrabavańni Niderłandaŭ ab asacyjacyi buduć abmiarkoŭvacca na samicie JEZ 15 śniežnia.
