Staršynia praŭleńnia Biełarusbanka Siarhiej Pisaryk adpraŭleny ŭ adstaŭku. Pra heta TUT.BY raspaviali niekalki infarmavanych krynic.
Pryčyny zvalnieńnia kiraŭnika najbujniejšaha kamiercyjnaha dziaržbanka im nieviadomyja. «Usio vielmi chutka adbyłosia», — skazaŭ adzin z surazmoŭcaŭ.
U pres-słužbie Biełarusbanka zapeŭnili, što siońnia Siarhiej Paŭłavič «byŭ na pracoŭnym miescy, padpisvaŭ dakumienty». A miesiac tamu jamu byŭ padoŭžany kantrakt na 5 hadoŭ.
«Zahad ab zvalnieńni pastupiŭ źvierchu», — kaža krynica.
Kiraŭnik naziralnaj rady Biełarusbanka, ministr finansaŭ Uładzimir Amaryn admoviŭsia ad kamientaroŭ.
Cikava, što niadaŭna byli adznačanyja zasłuhi bankira ŭ futbolnaj i teatralnaj śfierach. 27 listapada Siarhiej Pisaryk byŭ nazvany «Miecenatam hoda» ŭ ramkach Nacyjanalnaj teatralnaj premii. A praz tydzień jon braŭ udzieł va ŭračystym zakryćci futbolnaha siezona.
17 listapada Alaksandr Łukašenka paabiacaŭ navieści žalezny paradak u bankach. «U krainie kryzis, u Rasii kryzis. Davajcie pahladzim, jak žyvuć bankiry. Niadrenna žyvuć, lepš, čym u minułyja hady, niahledziačy na kryzis. U tym liku pa zarpłacie, kredyty sami sabie vydajuć. U bližejšy čas my naviadziom tam žalezny paradak», — skazaŭ jon na sustrečy z rasijskimi žurnalistami.
Nahadajem, što letam byli zatrymanyja jak minimum dva top-mieniedžary Biełarusbanka: vykanaŭčy dyrektar Anatol Bahavik i pieršy namieśnik staršyni praŭleńnia Hienadź Haspadaryk.
Siarhiej Pisaryk naradziŭsia ŭ 1969 hodzie ŭ horadzie Hancavičy Bresckaj vobłaści. Skončyŭ Narhas (Biełaruski dziaržaŭny ekanamičny univiersitet). Amal usia pracoŭnaja karjera była źviazanaja ź Biełarusbankam. Pryčym vialikaja častka — na kirujučych pasadach. Namieśnikam staršyni praŭleńnia Biełarusbanka Pisaryk staŭ u 2007 hodzie. Praz 4 hady jon uznačaliŭ bank.
