Realnyja najaŭnyja hrašovyja dachody žycharoŭ Biełarusi (za vylikam padatkaŭ, zboraŭ i ŭznosaŭ, z ulikam inflacyi) za studzień—kastryčnik 2016 hoda źnizilisia na 7,3% u paraŭnańni z anałahičnym letašnim pakazčykam, paviedamiŭ Biełstat. Heta samaje značnaje padzieńnie za apošnija 22 miesiacy.
U cełym dachody nasielnictva padajuć z 2015 hoda. Što tyčycca 2016 hoda, to ŭ studzieni źnižeńnie skłała 5,4% da studzienia 2015 hoda, u studzieni—lutym — 6,4%, studzieni—sakaviku — 6,5%, studzieni—krasaviku — 6,8%, studzieni—mai, studzieni—červieni i studzieni—lipieni — 7%, studzieni—žniŭni — 7,1%, studzieni—vieraśni — 7,2%.
Miž tym Minekanomiki raniej čakała, što realnyja najaŭnyja hrašovyja dachody nasielnictva ŭ pieršym kvartale 2016 hoda źniziacca na 1,5% da adpaviednaha pieryjadu 2015 hoda, u pieršym paŭhodździ buduć na letašnim uzroŭni, a pa vynikach dzieviaci miesiacaŭ — vyrastuć na 0,1%, pa vynikach hoda — na 0,5%.
17 listapada na pres-kanfierencyi ŭ Minsku dla rasijskich žurnalistaŭ Alaksandr Łukašenka znoŭ zajaviŭ ab nieabchodnaści pavieličeńnia zarobkaŭ u valutnym ekvivalencie da 500 dalaraŭ. «U 2017 hodzie — pamierci, ale treba vyjści na 500 dalaraŭ… Ja budu rabić usio dla taho, kab my vyjšli na 500», — padkreśliŭ jon.
U svaju čarhu ministr ekanomiki Uładzimir Zinoŭski, adkazvajučy ŭ kancy listapada na pytańni žurnalistaŭ, zajaviŭ, što pavyšeńnie siaredniaha zarobku da 500 dalaraŭ u nastupnym hodzie — «heta vielmi ciažkaja zadača».
Na dumku ekśpiertaŭ, rost dachodaŭ nasielnictva ŭ 2016—2020 hadach budzie nievialikim. «U hetaj piacihodcy možna raźličvać na vielmi ścipły rost dachodaŭ nasielnictva pry adsutnaści ekanamičnych reformaŭ. I navat kali jany adbuducca, efiekt my adčujem niachutka, tak što i ŭ hetym vypadku praryvaŭ u častcy pavieličeńnia dachodaŭ nasielnictva ŭ 2016—2020 hadach čakać nie varta», — ličyć ekśpiert Biełaruskaha ekanamičnaha daśledča-adukacyjnaha centra (BEROC) Kaciaryna Barnukova.
«U 2016—2020 hadach miarkujecca, što ekanomika budzie raści na ličanyja pracenty. Nijakich resursaŭ, kab pavyšać dachody nasielnictva bolš chutkimi tempami, u dziaržavy siońnia (va ŭmovach značnych vypłat pa ŭnutranych i źniešnich daŭhach) niama», — miarkuje dyrektar Daśledčaha centra IPM Alaksandr Čubryk.
Zhodna z acenkaj Jeŭrazijskaj fondu stabilizacyi i raźvićcia, pavieličeńnie ŭ 2017 hodzie siaredniaj zarabotnaj płaty ŭ Biełarusi da 500 dalaraŭ małavierahodnaje, paviedamiŭ raniej u intervju BiełaPAN dyrektar prajektnaj hrupy pa finansavych kredytach JEFSR Ališer Mirzojeŭ. «Z našaha punktu hledžańnia, dasiahnieńnie pastaŭlenaj mety źjaŭlajecca małavierahodnym pry ŭmovie zachavańnia abvieščanaha pryncypu pavyšeńnia zarabotnaj płaty suraźmierna rostu pradukcyjnaści pracy», — skazaŭ jon.
Zychodziačy z hetaha pryncypu, adznačyŭ Mirzojeŭ, vychad na zarabotnuju płatu ŭ 500 dalaraŭ zapatrabuje rostu pradukcyjnaści pracy prykładna na 33% pa najaŭnym valutnym kursie, što ŭ 2,5 razu pieravyšaje vyniki rekordnaha 2004 hoda.
