Biełaruś razhladaje Hruziju jak «absalutna siabroŭskuju nam dziaržavu». Pra heta zajaviŭ kiraŭnik MZS Biełarusi Uładzimir Makiej pa vynikach sustrečy sa svaim hruzinskim kaleham Michieiłam Džanelidze, paviedamlaje pres-słužba MZS.
Fota pres-słužby MZS Hruzii
Padčas vizitu Makiej adkryŭ pasolstva Biełarusi ŭ Tbilisi.
— Aficyjnaje adkryćcio našaha pasolstva, jakoje my pravodzim siońnia, kaža pra mnohaje. Heta śviedčyć pra toje, što my pryjšli siudy nadoŭha i nie źbirajemsia sychodzić. Ja ŭžo skazaŭ spadaru ministru, što, napeŭna, my dapuścili ŭ svoj čas pamyłku, što tak doŭha nie adkryvali našu dypłamatyčnuju ŭstanovu tut. Ale heta pamyłka siońnia vypraŭlenaja.
Fota pres-słužby MZS Hruzii
Kiraŭnik MZS Hruzii nazvaŭ rašeńnie adkryć pasolstva Biełarusi «histaryčnym», paviedamlaje pres-słužba hruzinskaha viedamstva.
Fota pres-słužby MZS Hruzii
Makiej taksama sustreŭsia z prezidentam Hruzii Hiorhijem Marhviełašvili i abmierkavaŭ padrychtoŭku jaho vizitu ŭ Biełaruś u 2017 hodzie. Inšymi surazmoŭcami kiraŭnika MZS stali staršynia parłamienta Iraklij Kabachidze i kiraŭnik Hruzinskaj aŭtakiefalnaj carkvy — Katalikos-Patryjarch Hruzii Illa II.
Makiej adznačyŭ, što kantakty i suviazi pamiž Biełaruskim ekzarchatam i Hruzinskaj apostalskaj aŭtakiefalnaj pravasłaŭnaj carkvoj pastajanna ŭmacoŭvajucca, što «spryjaje jašče bolšamu duchoŭnamu zbližeńniu narodaŭ Biełarusi i Hruzii».
Kiraŭnik Hruzinskaj aŭtakiefalnaj carkvy vysoka acaniŭ sacyjalnuju palityku, što pravodzicca ŭ Biełarusi, pa padtrymcy nasielnictva, a taksama miratvorčyja namahańni Minska na mižnarodnaj arenie.
Fota pres-słužby MZS Hruzii
Pa paviedamleńni hruzinskaha MZS, Uładzimir Makiej taksama naviedaŭ «liniju akupacyi» — tak u Hruzii nazyvajuć miažu pamiž kantralavanaj Tbilisi terytoryjaj i niepryznanymi Paŭdniovaj Asiecijaj i Abchazijaj, dzie paśla vajny 2008 hoda znachodziacca rasijskija vojski. Pavodle dadzienych hruzinskich ŚMI, Makiej pabyvaŭ u vioscy Churvaleci ŭ Haryjskim rajonie kala miažy z Paŭdniovaj Asiecijaj.
Makiej taksama ŭskłaŭ vianok da tbiliskaha Miemaryjała Hierojam, zahinułym u baraćbie za terytaryjalnuju cełasnaść Hruzii. MZS Biełarusi ŭdakładniaje, što heta było zroblena «ŭ adpaviednaści z farmatam aficyjnaha vizitu».
Fota pres-słužby MZS Hruzii
Nahadajem, paśla piacidzionnaj rasijskaj-hruzinskaj vajny ŭ žniŭni 2008 hoda Tbilisi straciŭ kantrol nad Paŭdniovaj Asiecijaj (Cchinvalskim rehijonam) i Abchazijaj, što abviaścili svaju niezaležnaść. Nieŭzabavie Rasija pryznała niezaležnaść respublik i pakinuła tam svaje vojski. Biełaruś, niahledziačy na pazicyju sajuźnika, pryznaje terytaryjalnuju cełasnaść Hruzii.
