 |
U biełaruskamoŭnym internecie pačalisia stychijnyja akcyi salidarnaści z čatyrma aryštavanymi byłymi siabrami «Biełaha lehijonu».
Kab vykazać svaju padtrymku i salidarnaść ź Siarhiejem Čysłavym, Iharam Korsakam, Mirasłavam Łazoŭskim i Viktaram Laščynskim karystalniki livejournal‑u masava staviać sabie na avatarki emblemu «Biełaha lehijonu» — znak sparyš.
Varta adznačyć, što heta ŭžo nia pieršaja padobnaja akcyja salidarnaści ŭ Biełnecie. Varta zhadać chacia b vypadki z Andrejem Kimam i Źmitrom Žaleźničenkam, ale ŭ vypadku ź «Biełym lehijonam» padobnaja akcyja salidarnaści ŭpieršyniu maje taki razmach.
Arhanizacyja «Bieły lehijon» była zasnavanaja na pačatku 1990‑ch častkaj maładziejšych siabroŭ źlikvidavanaha Biełaruskaha zhurtavańnia vajskoŭcaŭ (BZV) na bazie jahonaha moładzievaha kryła DRAB (Družyny rehijanalnaj achovy i biaśpieki). Arhanizacyja składałasia pieravažna z vajskoŭcaŭ-adstaŭnikoŭ i adukavanaje moładzi.
Arhanizacyja ŭźnikła jak reakcyi na pahrozy niezaležnaści Biełarusi, jakija tady realna isnavali. Kolkaść udzielnikaŭ «Biełaha lehijonu» nie pieravyšała 200 čałaviek. Adnak sam fakt jaho isnavańnia byŭ važnym znakam hatoŭnaści biełarusaŭ vystupić na abaronu dziaržaŭnaha suverenitetu. U hetym sensie «Bieły lehijon» adyhraŭ pazytyŭnuju histaryčnuju rolu, natchniajučy tych junakoŭ, čyje nacyjanalnyja pačućci sama farmavalisia. Varta adznačyć, što siabry arhanizacyi nikoli nia bralisia za zbroju i nia ŭciahvalisia ŭ ekstremisckuju dziejnaść. U tym vialikaje adroźnieńnie miž «Biełym lehijonam» i, naprykład, RNIE.
Dziejnaść arhanizacyi dasiahnuła apahieju ŭ 1999-m, kali pahroza niezaležnaści była najbolšaj, i zharnułasia ŭ 2000-ja, paśla źmieny palityčnaj sytuacyi.
ZP
* * *
Kamentar Redakcyi
Pa ironii losu ŭ chulihanstvie na Dzień niezaležnaści zapadozryli arhanizacyju, stvoranuju dla abarony niezaležnaści i raspuščanuju paśla źniknieńnia pahrozy niezaležnaści. KDB vybraŭ jaje ŭ jakaści achviarnaha kazła, kab apraŭdacca za pravał 4 lipienia i kab pahnać chvalu na apazycyju. Toj samy KDB, jaki dla našaj niezaležnaści ŭ 90-ja palec u palec nia ŭdaryŭ.
