 |
«Ja ŭjaŭlaju, jakomu cisku zaraz padviarhajucca tyja ludzi, jakich užo zatrymali pa hetaj spravie, u miescach ich źniavoleńnia. Ja nie vyklučaju, što ich katujuć, nie tolki psychalahična, ale, mahčyma, što i fizyčna. Jany buduć imknucca złamać, kab niechta ahavaryŭ siabie, i tady ŭsio budzie hatova dla ich: voś złačynca, jaki naležyć da apazycyi. I ŭłada, viedajučy, što heta niapraŭda, vydaść versiju za sapraŭdnuju. I jość sudździ, jakija hatovyja vykanać luby zahad».
Pavodle Mikoły Statkieviča, ułady ciapier nahadvajuć čałavieka, jaki, zhubiŭšy ŭ ciomnym lesie kašalok, šukaje jaho pad lichtarom, tamu što tam śviatlej.
«Mienski vybuch — heta pravał KDB, i najpierš upravy, jakaja zajmajecca baraćboj pa achovie kanstytucyjnaha ładu i baraćboj z teraryzmam. Usiu svaju dziejnaść hetaja ŭprava skiravała na toje, kab sačyć za školnikami, jakija naklejvajuć nalepki «Lublu Biełaruś». I kali jany 10 takich školnikaŭ dzie‑niebudź na leciščy adłavili, to heta ŭžo nahoda śvidravać dzirki pad zorki na pahonach i atrymoŭvać premii. A samyja składanyja dla ich aperacyi, — heta prakałoć koły ŭ mašynie apazycyjnaha palityka.
I voś hetyja «prafesijanały», jakija dyskvalifikavalisia całkam, apynulisia ŭ sytuacyi realnaha teraktu. Dzie jany pačynajuć šukać? Dzie pryvykli. Pavodle prafesijanalizmu biełaruskija specsłužby na vielmi nizkim uzroŭni… Pracavać pa spravach ab teraryźmie jany prosta nia ŭmiejuć».
Mikoła Statkievič, były kiraŭnik Biełaruskaha zhurtavańnia vajskoŭcaŭ, u jakoje ŭvachodziŭ i adzin z zatrymanych pa spravie ab vybuchu 4 lipienia Siarhiej Čysłaŭ, nahadaŭ, što ŭ 1993 hodzie urad Kiebiča sprabavaŭ abvinavacić BZV u arhanizacyi vybuchu na Płoščy niezaležnaści, ale biespaśpiachova. Tady bomba spracavała ŭ śmietnicy, nichto nie paciarpieŭ.
