Na naradzie 10 lipienia aficyjny kiraŭnik zahadaŭ zładzić vybary "hranična adkryta, demakratyčna dy prazrysta".
Kali "rabić prazrysta" jość zahadam, a nie pastulatam, to lahična vynikaje, što "mahčymyja varyjanty". Hetak sama paśla vybuchu la steły, kali adrazu stała zrazumieła, što šyła ŭ miachu nie schavaješ, medyjam było zahadana "havaryć ludziam praŭdu". Karaciej, ručnoje kiravańnie ŭ dziejańni.
Zhadka ž pra Zachad, chaj sabie i sa svojeasablivymi akcentami: my robim vybary nie dla "ich", a dla siabie, — jakraz i vydaje zacikaŭlenaść kiraŭnictva ŭ parazumieńni z Eŭropaj. Hetaje žadańnie aktualizujecca perspektyvaj baraćby z rasiejskim miadźviedziem za novy hazavy kantrakt pry kancy hodu.
Vyhladaje na toje, što jość stratehija: bolej-mieniej karektnym vykanańniem šerahu farmalnaściaŭ stvaryć karcinku adnosna cyvilizavanaj kampanii i potym rytaryčna zapytacca ŭ prydziraŭ-zachodnikaŭ: nu, čaho vy jašče ad nas chočacie?
Nadzieja zarabić nia samyja pravalnyja bały padtrymlivajecca adčuvańniem, što eŭrapiejskija dziejačy stamilisia bicca jak ryba ab lod u biełaruskim pytańni i zhodziacca zapluščyć vočy na fokus z padmienaj tavaru: zamiest realnych elementaŭ demakratyzacyi — brazhotki. Nu a kali finalnym akordam kampanii dyplamatyčnaha praryvu stanie vyzvaleńnie sami-viedajecie-kaho — šancy na toje, što Brusel rastanie, rezka padvyšajucca.
Pakul ža zamiežnikam nastojliva nakidajuć asiatrynu druhoj śviežaści. Dekret pra ułučeńnie ŭ CVK siabraŭ partyj vydajuć za demakratyčnuju sensacyju, choć taki ž dekret prymaŭsia i čatyry hady tamu. Aficyjnyja asoby zamoŭčvajuć (čytajcie pieršakrynicy, panovie!), što hetyja siabry pazbaŭlenyja prava nia tolki hałasavać, ale i brać udzieł u pravierkach, jakija ładziacca Centarvybarkamam. Karaciej, nuli biaz pałački.
Kali niejkaje kaliva apazycyjnych pradstaŭnikoŭ ułučać u inšyja kamisii, to heta, kaniečnie ž, nia stvoryć krytyčnaj masy. Farmalnuju roŭnaść umoŭ dla kandydataŭ taksama možna bolej-mieniej datrymać. Nu, biaz drobnaha fołu nie abydziecca, ale ž pa vialikim rachunku sapraŭdy niama patreby tak užo dadušvać "efemernuju apazycyju". Piać chvilin vystupu pa radyjo ŭ niazručny čas ci 50 bazavych adzinak na plakaty — heta katovy ślozy. Revalucyi nia budzie, a miž tym u hrafach "roŭny dostup da ŚMI" i "roŭnyja ŭmovy ahitacyi" možna stavić ptuški.
Razam z tym, kali prezydent padpiša (a heta moža adbycca dniami) novy zakon ab ŚMI — heta ŭdaryć pa reštkach niezaležnych medyjaŭ, u pryncypie pierakryje kisłarod alternatyŭnaj dumcy. To bok u systemnym planie hajki tolki zakručvajucca.
Apazycyju sapraŭdy zrabili amal što efemernaj. Na jaje marhinalizacyju represiŭnaja mašyna pracavała 14 hadoŭ. I ciapier farmalnaja roŭnaść u vyhladzie piacichvilinki efiru vyhladaje jak ździek. Chacia b tamu, što prapahandysckija "piacichvilinki nianaviści" zrabili dy praciahvajuć rabić svaju čornuju spravu. Ułada ŭžo damahłasia, što vybuchi čepka asacyjujucca z apazycyjaj. Chaj sabie potym i vyśvietlicca niedatyčnaść tych, kaho zaraz trasuć, — abyvatalu zapała ŭ padkorku: ci to jany kažuch ukrali, ci to ŭ ich…
Na naradzie pa vybarach prahučała: niachaj kožny apazycyjaner adkaža, dzie jon pracuje! Vidać, praca palityka im pavodle zmaŭčańnia zabaraniajecca. Raniej načalstva paraiła elektaratu cikavicca ŭ apazycyjaneraŭ, ci pasadzili tyja choć pa adnym drevie. Dyk heta kandydaty na pracu ŭ bataničnym sadzie ci na miescy ŭ parlamencie?
Kali ž surjozna, to ŭłady vydatna razumiejuć, što nijakaj Płoščy ŭ vieraśni nia budzie. Kab u krainie naros słoj niejkaha palityčnaha humusu, patrebien čas navat pry ŭmovie zaŭvažnaje adlihi. A tamu hulnia ŭ stroha vyznačanych miežach dla ŭłady prymalnaja: jana ničym nie ryzykuje, a voś bruselski płod moža i sarvać.
Miž tym apazycyja ŭžo vykazała zachodnikam svaju zaniepakojenaść perspektyvaj "kamercyjalizacyi" dyjalohu miž Zachadam dy Mienskam. Jana nia zhodnaja na "kvotu mandataŭ" zamiest źmiakčeńnia ramkavych palityčnych umoŭ.
Zastajecca pytańnie, nakolki stamiŭsia bicca hałavoj ab biełaruskuju ścianu Zachad. Nieŭzabavie my heta ubačym.
ZY. Tym časam pajšła chvala paviedamleńniaŭ pra novyja zatrymańni apazycyjnych aktyvistaŭ. Siłaviki, jakim nakrucili chvasty, mohuć pierahnuć kij dy sapsavać kiraŭnictvu dziaržavy scenar lehitymacyi čarhovych vybaraŭ. Lidery ADS, va ŭsiakim razie, zahavaryli pra "źmienu farmatu ŭdziełu".
