Uładzimier Navasiad, archiŭnaje fota
Uładzimier Navasiad, jaki byŭ deputatam Viarchoŭnaha Savietu Biełarusi 13-ha sklikańnia i Pałaty pradstaŭnikoŭ 2-ha sklikańnia, atrymaŭ aficyjny dyplom doktara filazofii ŭ halinie prava.
«Ja abaraniaŭsia va Ŭkrainie, va ŭniversytecie horadu Zaparožža, — raspavioŭ Svabodzie spadar Navasiad. — U našych susiedziaŭ Balonskaja systema, tamu farmalna ja ciapier doktar filazofii, ale kali pieravodzić na zvyčajnuju systemu, to heta chutčej kandydackaja dysertacyja.
Paśla abarony ŭ Zaparožžy, dzie nichto z čalcoŭ navukovaj rady nia kinuŭ mnie čornaha šara, daviałosia trymać jašče adzin ispyt. Reč u tym, što va Ŭkrainie ciapier šmat što praviarajuć na mahčymuju karupcyjnaść. Tamu daviałosia pajechać u Kijeŭ, u Ministerstva adukacyi, i tam prajści praz specyjalnuju praceduru pravierki. Usio prajšło dobra.
Tema majoj dysertacyi tyčycca administracyjnaha prava. Heta samakiravańnie i decentralizacyja ŭłady na prykładach dźviuch susiednich krain — Biełarusi i Ŭkrainy.
Navukovaja praca źjaviłasia nie na pustym miescy. Užo čaćviorty hod naša Partyja svabody i prahresu šmat zajmajecca prablemami samakiravańnia. Heta našaja niša, našaja dzialanka. My pracujem niepasredna z tavarystvami ŭłaśnikaŭ, z kaaperatyvami, jakija znachodziacca na samaabsłuhoŭvańni. U nas ahulnaja meta — efektyŭnaje kiravańnie damami. Chočam pakazać, što demakratyja, kali ludzi sami, biez dazvołaŭ ułady, rasparadžajucca svaimi finansami, jość niepasrednaja vyhada dla ludziej. Heta, badaj, adzinaja niša ŭ Biełarusi, dzie jašče možna kazać pra realnaje samakiravańnie.
My pravodzim seminary, treninhi. Tolki letaś praź ich prajšli 1970 čałaviek. Pryčym na praviadzieńnie vučoby my nia prosim sponsarskich hrošaj. Naadvarot, ludzi sami płaciać — 200 rubloŭ za try dni navučańnia. Ale toje, što ludzi pahadžajucca davać ułasnyja hrošy za viedy, śviedčyć, što my sapraŭdy vučym ich karysnym rečam. Pryčym ładzim seminary pa ŭsioj Biełarusi. Tak, ja letaś 75 dzion pravioŭ za miežami Miensku na našych kursach».
Partyja svabody i prahresu, jakuju ŭznačalvaje Ŭładzimier Navasiad, dahetul aficyjna nie zarehistravana. Spadar Navasiad spadziajecca, što sytuacyja źmienicca da lepšaha:«Uviesnu budziem pravodzić čarhovy źjezd arhkamitetu. Paśla znoŭ paniasiom dakumenty na rehistracyju. Pieršyja čatyry sproby byli niaŭdałymi».
