Mabilny apieratar velcom pracuje nad stvareńniem pieršaj u krainie sietki dla internetu rečaŭ (IoT — Internet of Things). Novaja technałohija zdolnaja nie tolki pavysić efiektyŭnaść kiravańnia haradskoj infrastrukturaj, ale i dazvolić karystalnikam dystancyjna kiravać chatnimi pryładami, paviedamili ŭ pres-słužbie velcom.
Jak rastłumačyli śpiecyjalisty apieratara, dla novaj sietki płanujecca zadziejničać vuzkuju pałasu častot u 200 kHc u tym ža dyjapazonie, jaki zaraz vykarystoŭvajecca dla GSM-suviazi. «Kab zapuścić novuju sietku, nie patrebny navat dadatkovy radyjočastotny resurs, — dastatkova tolki ažyćciavić prahramnyja nałady bazavych stancyj pad novuju technałohiju», — rastłumačyli ŭ kampanii.
Apieratar hatovy pačać budavańnie novaj sietki sioleta. Pry jaje najaŭnaści, da prykładu, u Minsku mohuć źjavicca razumnyja parkoŭki: z dapamohaj admysłovaj prahramy vadziciel zmoža daviedacca, ci jość volnyja miescy na parkoŭcy, na jakim uzroŭni jany znachodzicca, i ŭ vypadku nieabchodnaści zabranavać miesca. Pryncyp dziejańnia takoj parkoŭki hruntujecca na pracy śpiecyjalnych datčykaŭ, jakija apieratyŭna pieradajuć infarmacyju na bazavuju stancyju suviazi. Jašče adzin mahčymy kirunak — sistema dystancyjnaha kantrolu chimičnaha składu, jakaści i ŭzroŭniu vady ŭ vadajomach.
U budučyni takaja sietka mahła b dapamahčy i zvyčajnym abanientam: užo ciapier prapracoŭvajucca varyjanty ŭkaranieńnia intelektualnych ličylnikaŭ elektryčnaści, hazu, vady, sistem kiravańnia achoŭnaj i pažarnaj sihnalizacyjaj, sistemy prasočvańnia aŭtamabilaŭ, svojskich žyvioł i pradmietaŭ, elemientaŭ infrastruktury «razumnaha horada» (vuličnyja lichtary, kantejniery dla śmiećcia i h. d.).
«Praź niekalki hadoŭ internet budzie ŭ kožnaj pryładzie — televizar heta ci pralnaja mašyna. Vytvorcy ŭžo pačynajuć ŭkaraniać śpiecyjalnyja moduli ŭ svaju techniku, a ŭ budučyni heta zakranie bolšaść masavych madelaŭ», — ličać u velcom.
Novaja sietka, jak čakajecca, pa ŭzroŭni praniknieńnia ŭ 50 razoŭ moža pieravysić mahčymaści GSM-suviazi. Heta dazvoliła b adnolkava lohka «mieć znosiny» z «razumnymi» pryładami jak na adkrytaj miascovaści, tak i ŭnutry budynkaŭ, na cokalnych pavierchach i ŭ padvalnych pamiaškańniach.
