«U našych rasijskich partnioraŭ niama i najmienšaj padstavy dla zakłapočanaści ŭ suviazi z damoŭlenaściu Biełarusi i Mižnarodnaj arhanizacyi pa mihracyi stvaryć u našaj krainie centry časovaha ŭtrymańnia zamiežnych hramadzian, što adpaviadajuć samym sučasnym standartam», — zajaviŭ pres-sakratar MZS Biełarusi Dźmitryj Mirončyk, kamientujučy vykazvańni ministra zamiežnych spraŭ RF Siarhieja Łaŭrova.
«Finansavańnie hetaj pracy budzie ažyćciaŭlacca pry padtrymcy Jeŭrapiejskaha sajuza, — adznačyŭ Mirončyk. — Bo my robim toje ž samaje, što i našy rasijskija partniory jašče dziesiać hadoŭ tamu. Nahadaju, tady Mižnarodnaja arhanizacyja pa mihracyi i Jeŭrasajuz realizoŭvali anałahičny prajekt «Sadziejničańnie ŭradu Rasijskaj Fiederacyi va ŭmacavańni administracyjnaha patencyjału i zakanadaŭčaj bazy ŭ miežach realizacyi pahadnieńniaŭ ab readmisii».
«Akramia taho, — skazaŭ aficyjny pradstaŭnik ministerstva, — jany realizoŭvali, naprykład, prajekty «Padtrymka pahadnieńniaŭ ab readmisii, zaklučanych Jeŭrapiejskim sajuzam z Małdovaj, Rasijaj i Ukrainaj. Pytańni dobraachvotnaha viartańnia i reintehracyi (SIREADA)», «Dalejšaje raźvićcio miechanizmaŭ readmisii ŭ Rasijskaj Fiederacyi» i inšyja».
U miežach hetych prajektaŭ aproč inšaha rasijskamu boku MAM pry finansavaj padtrymcy ES akazvałasia sadziejničańnie ŭ «stvareńni sistemy centraŭ pa raźmiaščeńni hramadzian trecich krain, jakija buduć viartacca na terytoryju i z terytoryi RF u miežach readmisijnyjch pahadnieńniaŭ z krainami Jeŭropy i trecimi krainami», padkreśliŭ Mirončyk.
Biełaruski bok, adznačyŭ jon, nie staviŭ nijakich pytańniaŭ, tym bolš ni ŭ jakoj formie nie vykazvaŭ zakłapočanaści ŭ suviazi z takim supracoŭnictvam Rasii, Jeŭrasajuza i MAM. «My razumieli i ŭličvali, što hetaja praca skiravanaja na stabilizacyju i palapšeńnie mihracyjnaj situacyi na prastory krain — udzielnic Dahavora ab stvareńni Sajuznaj dziaržavy Biełarusi i Rasii, i vitali adpaviednyja namahańni našych rasijskich partnioraŭ», — zajaviŭ pradstaŭnik MZS.
Biełaruś zaraz robić «roŭna toje ž samaje, što i Rasija krychu raniej». «Adzinaje adroźnieńnie — na toj momant Rasijskaj Fiederacyjaj ŭžo było zaklučanaje pahadnieńnie ab readmisii ź ES i, adpaviedna, u jaje było abaviazacielstva prymać nielehalnych mihrantaŭ, jakija trapili ŭ Jeŭrasajuz praz rasijskuju terytoryju. U nas zaraz takoha abaviazacielstva niama, heta značyć my pracujem z ulikam rasijskaha vopytu i dla papiaredžańnia mahčymych prablem», — skazaŭ Mirončyk.
«My robim ahulnuju z Rasijaj spravu, jakaja całkam lažyć u rečyščy namahańniaŭ pa raźvićci ahulnaj mihracyjnaj prastory Biełarusi i Rasii», — dadaŭ jon.
Mirončyk taksama padkreśliŭ, što Biełaruś — «adna ź niešmatlikich krain kantynienta, jakaja efiektyŭna i cyvilizavana zajmajecca prablemaj mihracyi». «Heta adznačajuć i pryznajuć profilnyja mižnarodnyja struktury, uklučajučy Mižnarodnuju arhanizacyju pa mihracyi, Upraŭleńnie viarchoŭnaha kamisara AAN pa spravach biežancaŭ», — skazaŭ jon.
17 studzienia ŭ Maskvie Siarhiej Łaŭroŭ zajaviŭ, što pahadnieńnie Jeŭrasajuza i Biełarusi ab budaŭnictvie łahieraŭ dla mihrantaŭ i biežancaŭ vyklikaje pytańni. «U nas ź Biełaruśsiu Sajuznaja dziaržava, u miežach jakoj pryniataje pryncypovaje rašeńnie vyraŭnoŭvać pravy hramadzian i adnoj, i druhoj krainy va ŭsich biez vyklučeńnia halinach, — skazaŭ Łaŭroŭ. — I adnoj z takich śfier prykładańnia našych ciapierašnich namahańniaŭ źjaŭlajecca ŭzhadnieńnie paramietraŭ adzinaj vizavaj, adzinaj mihracyjnaj prastory. Heta patrabuje siarod inšaha vyznačeńnia adzinaha śpisa asob, jakija niepažadanyja, jakija pažadanyja, ale heta taksama patrabuje adzinaj palityki ŭ halinie ekstradycyi. Ciapier heta jašče bolš aktualna, bo jość tema ab damoŭlenaści pamiž Biełaruśsiu i Jeŭrasajuzam pra stvareńnie łahieraŭ dla mihrantaŭ, nielehalnych na terytoryi respubliki».
Łaŭroŭ padkreśliŭ, što ŭ Rasii i Biełarusi niama aformlenaj naziemnaj suchaputnaj miažy. «Heta stvaraje, viadoma ž, pytańni i mahčymaści dla złoŭžyvańniaŭ. My pačynajem z našymi biełaruskimi kalehami dyjałoh na hetuju temu. My, u pryncypie, užo daŭno viadziem pieramovy pra adzinuju mihracyjnuju palityku. Zaraz, dumaju, usie hetyja padziei patrabujuć paskoryć hetyja razmovy i pryvieści, narešcie, da niejkich vynikaŭ», — zajaviŭ kiraŭnik rasijskaha źniešniepalityčnaha viedamstva.
