Prezident ZŠA Barak Abama źmiakčyŭ prysud infarmataru Wikileaks Čełsi Meninh, jakaja była asudžanaja na 35 hadoŭ. Jak paviedamlaje The New York Times, Meninh vyjdzie na svabodu 17 maja 2017 hoda.
Usiaho 17 studzienia Abama źmiakčyŭ prysud 273 źniavolenym, 64 ź ich byli pamiłavanyja. Usiaho za svajo praŭleńnie jon skaraciŭ termin źniavoleńnia 1385 ludziam, ź ich bolš za 500 byli asudžanyja pažyćciova.
U Biełym domie adznačajuć, što Abama skaraciŭ terminy pazbaŭleńnia voli bolšaj kolkaści ludziej, čym usie jaho papiaredniki na pasadzie prezidenta.
Čełsi Meninh adbyvaje pakarańnie za kradziež i pieradaču prajektu WikiLeaks dakumientaŭ i videazapisaŭ Pientahona, siarod jakich była zdymka rasstrełu žurnalistaŭ ŭ Iraku amierykanskim vajskovym viertalotam. Jana pavinna była vyjści na volu ŭ 2045 hodzie.
Da vyniasieńnia prysudu ŭ 2013 hodzie jana była viadomaja jak mužčyna pa imieni Bredli Meninh. U turmie jana damahłasia prava na apieracyju pa źmienie połu. U źniavoleńni Čełsi Meninh prynamsi dvojčy sprabavała pakončyć z saboj.
