Biełaruś pa doli vysokatechnałahičnych vytvorčaściaŭ adstaje ad raźvitych krain u try razy, pa ŭzroŭni pradukcyjnaści pracy — u čatyry-piać razoŭ. Takija dadzienyja pryvodziacca ŭ dakładzie dyrektara Navukova-daśledčaha ekanamičnaha instytuta (NDEI) Ministerstva ekanomiki Alaksandra Čarviakova, apublikavanym u apošnim numary «Ekanamičnaha biuletenia», jaki vydajecca instytutam.
Z dakładam dyrektar NDEI vystupaŭ na navukovaj kanfierencyi vosieńniu minułaha hoda.
«Pierad ekanomikaj Biełarusi stajać niaprostyja zadačy, źviazanyja sa stabilizacyjaj ekanamičnaha raźvićcia krainy i vychadam na trajektoryju ŭstojlivaha rostu, ź pieraadoleńniem ryzyk i pahroz ekanamičnaj biaśpieki», — havorycca ŭ dakładzie.
Jaho aŭtar kanstatuje, što na praciahu mnohich hadoŭ ekanamičnaja madel Biełarusi «hruntavałasia na takich tradycyjnych miechanizmach ekanamičnaha rostu, jak pavieličeńnie abjomaŭ vytvorčaści za košt dazahruzki vytvorčych mahutnaściaŭ; pramoje subsidavańnie asobnych dziaržpradpryjemstvaŭ; miakkaja manietarnaja i fiskalnaja palityki». Faktary, jakija raniej zabiaśpiečvali rost ekanomiki, pastupova stali strymalnymi, a kryzisnyja źjavy na suśvietnym rynku tolki ŭzmacnili hetyja pracesy.
«Pa-pieršaje, dyrektyŭnaje kredytavańnie i dziaržpadtrymka abmiežavanaj kolkaści pradpryjemstvaŭ, stvareńnie dla ich «ciapličnych» umoŭ nie stymulavała ich da pavyšeńnia addačy ad układzienych srodkaŭ i rostu kankurentazdolnaści. Pa-druhoje, zachoŭvalisia nievysoki inavacyjny składnik ekanomiki i nizkaja addača ad inviestycyj», — adznačaje Alaksandr Čarviakoŭ.
Jak śledstva, halinovaja struktura nie źviedała istotnych źmien, «tamu ekanomika zastałasia vysokazatratnaj i nizkatechnałahičnaj».
«U 2015 hodzie ŭ pramysłovaści dola vysokatechnałahičnaha siektara skłała 3,2%, a nizkatechnałahičnych vytvorčaściaŭ — bolš za 33%. U toj ža čas u Hiermanii dola vysokatechnałahičnaha siektara pieravyšaje 9%, Francyi i ZŠA — 13%. U vyniku adznačajecca amal trochrazovaje adstavańnie ad uzroŭniu raźvitych krain pa doli vysokich technałohij i čatyroch-piacirazovaje — pa ŭzroŭni pradukcyjnaści pracy ŭ pramysłovaści», — havorycca ŭ dakładzie.
U siońniašnich realijach hałoŭnymi faktarami, ad jakich zaležyć rost ekanomiki, źjaŭlajucca źnižeńnie zatrat vytvorčaści praz vybudoŭvańnie i aptymizacyju biźnies-pracesaŭ, a taksama kompleksnaja madernizacyja technałohij, u tym liku kiraŭničych, ličyć dyrektar NDEI.
Na jaho dumku, namahańni dziaržavy pavinny być nakiravany na realizacyju praryŭnych prajektaŭ, jakija daduć ekanamičny efiekt. «Metazhodnym ujaŭlajecca stvareńnie centra prajektnaha kiravańnia pry Saviecie ministraŭ. Asnoŭnaja jaho meta — skancentravać namahańni dziaržavy na praryŭnych prajektach, vystupić katalizataram dziełavoj aktyŭnaści i inviestycyj u pryjarytetnyja kirunki raźvićcia», — ličyć Alaksandr Čarviakoŭ.
