U Paŭdniovaj Karei na fonie karupcyjnaha skandału ŭ vyšejšych ešałonach ułady ŭpieršyniu uziaty pad aryšt dziejny ministr. Im stała ministr kultury, sportu i turyzmu Čo Jun Sun. Pavodle danych śledstva, jana skłała śpis z tysiač dziejačaŭ kultury, jakich treba było pazbavić mahčymaści atrymlivać dziaržaŭnaje finansavańnie, pieradaje RIAN sa spasyłkaj na Kyodo. Jak paviedamlaje Reuters, u subotu pavinien prajści jaje pieršy dopyt u novym statusie.
digitaljournal.com
Pavodle danych śledstva, u «čorny śpis» Čo Jun Sun uvajšli bolš za 9400 artystaŭ i dziejačaŭ kultury, krytyčna nastrojenych suprać ułady prezidenta Pak Kyn Che. Paznačanych asob pavinny byli pazbaŭlać lubych vidaŭ dziaržaŭnych subsidyj i dapamohi. Sama jana isnavańnie padobnaha pieraliku raniej admaŭlała.
Akramia taho, sud vydaŭ ordar na aryšt byłoha kiraŭnika administracyi prezidenta.
Ahienctva Yonhap paviedamiła ab tym, što nieŭzabavie paśla aryštu Čo Jun Sun prapanavali syści ŭ adstaŭku. Čakajecca, što jaje zajava budzie chutka padpisanaja premjer-ministram, jaki paśla adstaŭki prezidenta Pak Kyn Che časova vykonvaje abaviazki kiraŭnika dziaržavy.
Z vosieni minułaha hoda ŭ Paŭdniovaj Karei razhareŭsia karupcyjny skandał vakoł Cchvie Sun Sil — najlepšaj siabroŭki prezidenta krainy, jakaja niefarmalna akazvała vialiki ŭpłyŭ na rašeńni Pak Kyn Che. Pravaachoŭnyja orhany padazrajuć jaje ŭ tym, što jana, nie zajmajučy nijakich dziaržaŭnych pasadaŭ, udzielničała ŭ pryniaćci palityčnych rašeńniaŭ, a taksama vymahała bujnyja sumy ŭ paŭdniovakarejskich karparacyj, damahajučysia finansavańnia svaich fondaŭ.
Paśla aryštu Cchvie Sun Sil uźnikli padazreńni, što karupcyjnyja schiemy i cisk na bujny biznes adbyvalisia ź viedama prezidenta. U pačatku śniežnia Pak Kyn Che byŭ abvieščany impičmient. Ciapier vykonvajučym abaviazki kiraŭnika dziaržavy staŭ premjer-ministr Chvan Hie An. Kanstytucyjny sud u ciapierašni čas vyrašaje pytańnie ab pravamocnaści abvieščanaha impičmientu prezidentu. Kali heta rašeńnie budzie paćvierdžanaje, na praciahu dvuch miesiacaŭ u krainie projduć vybary novaha kiraŭnika dziaržavy.
