U dołaravym ekvivalencie vałavy ŭnutrany pradukt Biełarusi ŭ 2016 hodzie akazaŭsia najmienšym z 2007 hoda, śviedčać źviestki Mižnarodnaha valutnaha fondu.
«Pa siarednieŭzvažanym kursie VUP u dołaravym ekvivalencie ŭ 2016 hodzie skłaŭ 47,2 młrd dołaraŭ, u 2015-m — 55,3 młrd z ulikam apošniaj aficyjnaj udakładnienaj acenki hetaha pakazčyka. Takim čynam, u 2016-m u paraŭnańni z 2015-m VUP źniziŭsia na 8,1 młrd dołaraŭ, abo na 14,7%», — paviedamiŭ BiełaPAN finansavy analityk daśledčaj hrupy BusinessForecast.by Alaksandr Mucha, kamientujučy aficyjnuju statystyku.
«Skaračeńnie VUP u dołaravym ekvivalencie abumoŭlenaje źnižeńniem ŭ 2016 hodzie siarednieŭzvažanaha kursu biełaruskaha rubla na 23% u paraŭnańni z 2015 hodam», — rastłumačyŭ Mucha.
U 2007 hodzie VUP skłaŭ 45,2 młrd dołaraŭ.
Ekśpiert adznačyŭ, što dołaravy ekvivalent VUP vykarystoŭvajecca nie tolki ŭ mižnarodnaj paraŭnalnaj statystyki, ale i pry raźliku cełaha šerahu pakazčykaŭ ekanamičnaj biaśpieki (u pryvatnaści adnosiny dziarždoŭhu da VUP).
«Vidavočna, na fonie prykmietnaha źmianšeńnia dołaravaha ekvivalentu VUP možna čakać paharšeńnia hetych paramietraŭ, jakija prymajucca da ŭvahi zamiežnymi inviestarami, trymalnikami biełaruskich jeŭraablihacyj, mižnarodnymi rejtynhavymi ahienctvami. Źnižeńnie VUP u dołaravym ekvivalencie — niehatyŭny sihnał dla šerahu źniešnich kontrahientaŭ našaj krainy», — zajaviŭ Mucha.
Ekanamičnaja palityka ŭnutry krainy, ličyć analityk, pavinna być skiravanaja na stabilizacyju dołaravaha ekvivalentu VUP i praduhledžvać pastupovy rost hetaha pakazčyka.
U toj ža čas sproba dziaržavy stymulavać dachody nasielnictva i pavialičyć siaredniuju zarpłatu ŭ 2017 hodzie da 500 dołaraŭ moža mieć advarotny efiekt, ličyć jon.
«Kab davieści siaredniuju zarpłatu da 500 dołaraŭ, treba nie tolki pavialičyć hrašovuju prapanovu, ale i zabiaśpiečyć stabilnaść kursu biełaruskaha rubla. Heta moža pryvieści da praźmiernaha ŭmacavańnia abmiennaha kursu nacvaluty, što admoŭna adabjecca na cenavaj kankurentazdolnaści biełaruskaha ekspartu i pryviadzie da skaračeńnia valutnaj vyručki», — skazaŭ Mucha.
Jak vynik, ličyć jon, nacisk na kurs rubla ŭzraście, moža adbycca abiascenieńnie rubla, i heta siarod inšaha pryviadzie da źnižeńnia VUP u dołaravym ekvivalencie. Pa hetym zahannym kole, padkreśliŭ surazmoŭca, raniej Biełaruś užo prachodziła, «i paŭstaje pytańnie, ci varta iści pa im jašče raz dziela pavieličeńnia zarpłat u vielmi karotkaterminovaj pierśpiektyvie».
Jak paviedamlałasia raniej, biełaruskija ŭłady pastavili zadaču zabiaśpiečyć rost siaredniaj zarpłaty ŭ 2017 hodzie da 500 dołaraŭ. Zhodna z acenkaj Jeŭrazijskaha fondu stabilizacyi i raźvićcia, sa srodkaŭ jakoha Biełaruś atrymlivaje tranšami čarhovy kredyt, zabiaśpiečyć rost siaredniaj zarpłaty da 500 dołaraŭ u 2017 hodzie nierealna.
«Z našaha punkta hledžańnia, dasiahnieńnie pastaŭlenaj mety źjaŭlajecca małavierahodnym pry ŭmovie zachavańnia abvieščanaha pryncypu pavyšeńnia zarabotnaj płaty adpaviedna rostu pradukcyjnaści pracy», — zajaviŭ u śniežni 2016 hoda ŭ intervju BiełaPAN dyrektar prajektnaj hrupy pa finansavych kredytach Jeŭrazijskaha fondu stabilizacyi i raźvićcia Ališer Mirzojeŭ.
