Śviatkavańnie Vialikadnia ŭ mai 2016 hoda dla pary z Babrujska skončyłasia vyklikam reanimacyi i milicyi. Zaŭvažyŭšy vołas u ježy, Rusłan schapiŭsia za nož i źniaŭ z žonki skalp. Paśla pieraniesienaj apieracyi žančyna admoviłasia pryciahvać muža da adkaznaści. Ekśpiertyza pakazała: traŭma adnosicca da katehoryi lohkich cialesnych paškodžańniaŭ, i kryminalnuju spravu zavodzić nie stali.
Fota Alaksandra Čuhujeva
— Usio skončyłasia miram, inakš nielha. U nas usio kłas, — koratka prakamientavaŭ situacyju TUT.BY 37-hadovy Rusłan.
Nahadajem, u toj dzień, 1 maja, pakul žonka hladzieła televizar, mužčyna pajšoŭ na kuchniu pierakusić, zaŭvažyŭ u ježy vołas, schapiŭsia za nož i z krykam padbieh da Taćciany. Što było dalej, žančyna nie pamiataje, jana zhubiła prytomnaść i ačuniała ŭžo ŭ reanimacyi, dzie daktary paviedamili — muž źniaŭ ź jaje skalp.
Taćciana pra vypadak raspaviadała spakojna: «Rusłan vielmi hreblivy».
Akazałasia, u pary nie pieršy raz byli kanflikty na hetaj hlebie. Mužčyna navat pahražaŭ skleić vałasy žonki klejem, kab jany nie valalisia ŭ vannaj i na kuchni. Kab dahadzić, Taćciana zrabiła karotkuju stryžku, ale heta jaje nie ŭratavała.
Pakul paciarpiełaja lažała ŭ balnicy, da spravy padklučyłasia babrujskaja milicyja.
- U suviazi z tym, što žonka napisała zajavu z prośbaj spynić pravierku, i skazała, što pretenzij bolš nie maje, było pryniata rašeńnie muža nie karać, — prakamientavaŭ Dźmitryj Ihnatovič, aficyjny pradstaŭnik UUS Mahiloŭskaha abłvykankama.
Z ulikam taho, što traŭmu Taćciany adnieśli da katehoryi lohkich cialesnych paškodžańniaŭ, kryminalnuju spravu zavodzić nie stali. Takija situacyi — sprava pryvatnaha abvinavačvańnia, vinavataha karajuć tolki ŭ tym vypadku, kali druhi bok hetaha patrabuje. Kali b Taćciana nie daravała muža, jaho mahli sudzić pa art. 153 KK «Naŭmysnaje pryčynieńnie lohkaha cialesnaha paškodžańnia». Sankcyja artykuła praduhledžvaje da troch miesiacaŭ aryštu.
Ad Rusłana Taćciana syšła.
- Tak, ja jamu daravała i vyrašyła nie karać, — raspaviadaje Taćciana. — Hetymi dniami budzie, jak my 14 hadoŭ žyviem razam. Rusłan prychodzić da mianie dadomu časam, choča viarnuć, napeŭna, kachaje. Ja viartacca nie chaču i nie mahu, da kanca nie vyrašyła: kachaju jaho ci nie. Zaraz adčuvaju siabie narmalna, vałasy adraśli!
