U mai vuličnym muzykam daduć 12 aficyjnych placovak dla vystupaŭ u padziemnych pierachodach, paviedamili siońnia «Minsk-naviny» sa spasyłkaj na ŭpraŭleńnie ideałahičnaj raboty, kultury i pa spravach moładzi Minharvykankama.
Prajekt maje nazvu «Muzyčnaja mapa Minska», a vystupać muzyki buduć «nie tolki ŭ centry, ale i addalenych rajonach».
Što dla hetaha treba?
Vy zachacieli vystupić u padziemnym pierachodzie. Vam treba:
- pakinuć zajaŭku HU «Minskkancerta» na sajcie piešiechodka.bieł abo ŭ supołkach «Piešiechodka. Piešachodny kvartał» u sac sietkach.
- vystupić 13 maja na fiestyvali «Huki vulic»
- čakać vyniku žury, jakoje vydaje dazvoły na vystupy
Dzie i jak možna budzie vystupać?
Vy zmožacie ceły hod, choć kožny dzień, vystupać na «Muzyčnaj karcie Minska». Tudy ŭvachodziać 12 kropak pa usim horadzie. Na sajcie Minsk-Naviny niekatoryja miescy ŭžo ŭkazanyja. Heta — pierachody la handlovaha centra «Stalica», HUMa, pobač sa stancyjami mietro «Puškinskaja», «Płošča Jakuba Kołasa», «Partyzanskaja», «Mahiloŭskaja», «Malinaŭka», «Piatroŭščyna», «Kamiennaja Horka».
Navošta heta zrabili?
Kiraŭnik HU «Minskkancerta» Alena Radzivonava ličyć, što siońniašnija kancerty ŭ pierachodach nie pavinny prachodzić tak stychijna.
«Kab muzyki byli nie biezabličnymi, a dobra viadomymi hledačam. Kab na vystupy prychodziła šmat ludziej. Mnie zdajecca, heta dapamoža sfarmavać u publiki bolš surjoznaje staŭleńnie da vuličnaj muzyki. My budziem rychtavać afišy, anansavać prahramu, paznačym usie placoŭki admysłovymi banierami».
Pry hetym u artykule adznačajecca, što za miažoj heta ŭžo daŭniaja praktyka. «U Barsiełonie, naprykład, jaho vydajuć na hod. U Ńju-Jorku ci Łondanie dla vystupaŭ u mietrapalitenie pravodziać vielmi surjozny adbor. Chaj i naš horad ŭpryhožyć novy muzyčny prajekt», — padkreśliła načalnik upraŭleńnia kultury Minharvykankama Vitalina Rudzikava.