Patryjarch Maskoŭski i ŭsiaje Rusi Kirył, vystupajučy na Kaladnych čytańniach u Dziarždumie, prapanavaŭ deputatam padumać ab metazhodnaści stvareńnia ŭ krainie śpiecyjalnych bankaŭ dla biednych słajoŭ nasielnictva, pieradaje VVS.
Pavodle jaho słoŭ, padobnaja finansavaja sistema paśpiachova isnuje ŭ Indyi.
«Časam čałavieku prosta treba było 200 dalaraŭ, kab pačać svaju spravu. I voś znajšoŭsia čałaviek, sam ź biedniakoŭ, jaki stvaryŭ vydatnuju sistemu bankaŭ dla biednych — biez hetych šalonych pracentaŭ, biez taho, kab zakabalać ludziej. Ale časam hetyja 200-300 dalaraŭ dapamahali čałavieku pačać svaju spravu. Hetaja inicyjatyva była vielmi vysoka acenienaja tymi, z kim mnie davodziłasia jaje abmiarkoŭvać», — raspavioŭ pradstajaciel RPC ab indyjskim dośviedzie.
Mahčyma, pradstajaciel RPC mieŭ na ŭvazie biznesmena z Banhładeš, jaki naradziŭsia ŭ brytanskaj Indyi, Muchamada Junusa.
Kirył taksama skazaŭ, što ličyć amaralnaj «praktyku lichviarstva» ŭ halinie mikrakredytaŭ dla nasielnictva.
«Mnohija siemji ŭ našaj krainie paciarpieli ad mikrakredytaŭ. Drobnyja kredyty, karotkaterminovyja pazyki, jakija pradastaŭlajuć čaściej za ŭsio małazabiaśpiečanym ludziam. Jany biaruć kredyty, nie razumiejučy, u jakuju daŭhavuju jamu ŭviazvajucca. Heta absalutna amaralnaja praktyka lichviarstva», — skazaŭ jon.
