28 studzienia hramadskaja zała Sabora Kiryły Turaŭskaha ŭ Ńju-Jorku sustrakała śpievaka Źmitra Vajciuškieviča, jaki prylacieŭ u ZŠA, kab vystupić u Ńju-Jorku, Hajlend-Parku (Ńju-Džersi), San-Francyska, a taksama dać niekalki kancertaŭ u Taronta i Atavie (Kanada).
Hetym razam Źmicier paradavaŭ prysutnych dźviuma pieśniami-premjerami: «Šalik» na słovy Uładzimira Niaklajeva i «Ja trymaŭ ciabie za ruku…» na słovy Alesia Lipaja.
Pryjazna byli sustretyja słuchačami dobra viadomyja i lubimyja pieśni «Žyvie Biełaruś», «Ja naradziŭsia tut», «Naš ściah», «Na Kalady» - zała śpiavała razam sa Źmitrom i achvotna nabyvała jahonyja dyski i aŭtohrafy.
U prahramie sustrečy byŭ zapłanavany nie tolki kancert. Arhanizatary Volha i Alena Tałatynik padrychtavali «fotasušku» - vystavu fotazdymkaŭ z krajavidami Biearusi, jakija možna było ŭziać z saboju ŭ jakaści padarunka. Ale hałoŭnym siurpryzam staŭsia pačastunak — tradycyjnyja biełaruskija stravy babka, kisiel, «žuravinka», jakija Volha i Alena, stvaralnicy jutub-kanała «Bieraściejskaja kucharačka» pryhatavali dla haściej.
