Ministerstva finansaŭ ZŠA asłabiła sankcyi, uviedzienyja suprać Fiederalnaj słužby biaśpieki Rasii z-za abvinavačvańniaŭ u dačynieńni da kibieratak. Adpaviedny dakumient apublikavany na sajcie amierykanskaha kaznačejstva, paviedamlaje VVS.
Zhodna z dakumientam, jaki nazyvajecca «Hienieralnaja licenzija numar 1», kaznačejstva dazvalaje ŭsie ŭhody z FSB, jakija byli zabaronienyja dvuma ŭkazami byłoha prezidenta ZŠA Baraka Abamy ad 1 krasavika 2015 hoda i ad 28 śniežnia 2016 hoda.
Dakumient dazvalaje ŭhody, jakija nieabchodnyja i nakiravanyja na «zapyt, atrymańnie, vykarystańnie, apłatu abo prymianieńnie licenzij, dazvołaŭ, siertyfikataŭ abo paviedamleńniaŭ, vypuščanych abo zarehistravanych Fiederalnaj słužbaj biaśpieki, dla impartu, raspaŭsiudžvańnia abo vykarystańnia praduktaŭ infarmacyjnych technałohij u Rasijskaj Fiederacyi».
Pry hetym ahulny košt apłaty nie pavinien pieravyšać 5 tysiač dalaraŭ u hod. Jakija mienavita technałohii majucca na ŭvazie, nie ŭdakładniajecca.
U dakumiencie taksama adznačajecca, što dla ekspartu tavaraŭ abo technałohij, jakija źjaŭlajucca pradmietam admysłovaha ekspartnaha rehulavańnia, treba budzie atrymlivać dazvoł ministerstva handlu.
Pry hetym u dakumiencie ŭdakładniajecca, što jon nie daje dazvołu na ekspart ci rieekspart tavaraŭ i technałohij samoj FSB ci tamu, chto vystupaje ad imia arhanizacyi. Taksama dakumient nie dazvalaje ekspart tavaraŭ abo pasłuh u anieksavany Rasijaj Krym.
Abama ŭvioŭ sankcyi z-za abvinavačvańniaŭ u tym, što Rasija ŭdzielničała ŭ kibieratacy na amierykanskija palityčnyja struktury.
