Majki — dałoŭ
Na łavie padsudnych u kletcy — čaćviora maładzionaŭ. Jašče dvoje — ŭ zale.
Padtrymać chłopcaŭ pryjšło šmat narodu — zała suda była całkam zapoŭniena. Adpaviedna, milicyjanty pryniali nadzvyčajnyja zachady biaśpieki: užo na ŭvachodzie ŭ sud supracoŭnik u cyvilnym ź videakamieraj vioŭ pierapis naviednikaŭ. Na ŭvachodzie ŭ zału ludziej sustreła ramka mietałašukalnika i jašče adzin «apieratar».
Kožnaha — ad znajomaha abvinavačanych da advakata — dahladali vielmi pilna. Antyfašystaŭ, jakija pryjšli hledačami na praces, amapaŭcy prymušali padymać švedry i pakazvać majki pad imi.
Dvaim chłopcam zahadali majki źniać. Niepakoj u milicyjantaŭ vyklikali nadpisy «Revalucyja śviadomaści. Jana ŭžo idzie» na adnoj z majek, i nadpis «antyfa» na inšaj.
Na pytańnie, na jakoj padstavie ludziej raspranajuć, adzin z amapaŭcaŭ adkazaŭ tak:
«My nie prymušajem ludziej zdymać majki, my prapanujem. Inakš im prosta moža nie chapić miesca ŭ zali suda».
U samoj zale, darečy, adrazu zahučali kryki ŭ adras naviednikaŭ pracesu: «Nie treba machać adno adnamu!», «Nie treba zdymać!» — milicyjanty zabaraniali ŭsie sproby kamunikacyi.
Pamachać synu nie dazvolili navat maci Illi Vałavika.
Staraja sprava na novy ład
Sutyčka pamiž prychilnikami dvuch minskich futbolnych kłubaŭ — «ultrapravymi» fanatami «Tarpieda» i «antyfašystami», što zaŭziejuć za «Partyzan» — adbyłasia jašče 29 červienia 2014 hoda. Spačatku spravu spynili, ale amal praz 1,5 hoda ŭ lutym 2016 zatrymali dvaich prychilnikaŭ antyfašysckaha ruchu — Arcioma Kraŭčanku i Andreja Čartoviča. Ich vinavacili ŭ zachoŭvańni narkotykaŭ.
Kraŭčanka i Čartovič zakryvajuć tvary
Praź miesiac paśla zatrymańnia Čartoviča z Kraŭčankam spravu ab bojcy ŭ 2014 hodzie raptam adnavili, praviali šerah vobšukaŭ siarod minskich antyfa, niekatorych zatrymali.
Takim čynam, sudziać šaściarych. Heta Illa Vałavik, Vadzim Bojka, Dźmitry Ciechanovič, Filip Ivanoŭ, Arciom Kraŭčanka i Andrej Čartovič. Ich usich abvinavačvajuć u asabliva złosnym chulihanstvie. Akramia taho, Vałavika vinavaciać u kiraŭnictvie niezarehistravanaj arhanizacyjaj — a heta moža paciahnuć pazbaŭleńnie voli na termin da 3 hadoŭ. Kraŭčanku z Čartovičam abvinavačvajuć u zachoŭvańni i raspaŭsiudzie narkotykaŭ.
Čaćviora chłopcaŭ znachodziacca pad vartaj. Kraŭčanka i Čartovič ź lutaha 2016 hoda, Vałavik i Bojka — z sakavika.
Filip Ivanoŭ i Dźmitry Ciechanovič pakul na voli. Ivanoŭ pracuje internam u 10-j kliničnaj balnicy, jon anestezijołah-reanimatołah. Ciechanovič — hruzčyk u kramie «Karavaj».
Dźmitryj Ciechanovič razmaŭlaje z advakatam
Cikavy momant u spravie, što spačatku anijakich paciarpiełych u joj nie było — jany taksama źjavilisia tolki praz paŭtary hady. Pa słovach advakatki Hanny Bachcinaj, paciarpiełymi buduć prachodzić pasažyry taho tralejbusa i fanaty «Tarpieda».
Praŭda, na praces nichto ź ich nie pryjšoŭ.
Taksama, pa niepaćvierdžanaj pakul infarmacyi, adzin z fanataŭ «Tarpieda» raptam vyrašyŭ stać paciarpiełym paśla taho, jak jaho zakryli za spravu, źviazanuju z narkotykami.
Radykalnyja idei antyfašyzmu i antyrasizmu
Prakuror začytaŭ abvinavačvańnie. Pa viersii śledstva, Illa Vałavik uznačalvaŭ šerah «hramadskich abjadnańniaŭ, jakija nie prajšli dziaržaŭnuju rehistracyju»
«Pieršaja kroŭ», «Chieŭra», «Red-white hunters», «Hardblow», «New school band», — pieraličyŭ prakuror. — Supołki, čyja dziejnaść źviazanaja z hvałtam nad hramadzianami, prapahandaj radykalnych idej antyfašyzmu, antyrasizmu, anarchizmu».
Vałavika prakuror nieadnarazova nazvaŭ adnym z kiraŭnikoŭ hetych «arhanizacyj». Nibyta Vałavik ažyćciaŭlaŭ padbor i pryjom novych čalcoŭ, arhanizoŭvaŭ treniroŭki, bojki z apanientami, źbiraŭ unioski. Bojku z tarpiedaŭcami Vałavik spłanavaŭ zahadzia, a ciaham jaje kaardynavaŭ dziejańni inšych.
Pieršaja sutyčka z tarpiedaŭcami 29 červienia adbyłasia na prypynku na vulicy Nieścierava, praciahnuŭ čytać abvinavačvańnie prakuror.
«Dziejničajučy pa matyvach ideałahičnaj varožaści ŭ dačynieńni da sacyjalnaj hrupy fanataŭ «Tarpieda» abvinavačanyja zładzili bojku niepasredna na prypynku.
Zatym tarpiedaŭcy zahruzilisia ŭ tralejbus numar 3, kab pajechać na stadyjon: pavinna była adbycca hulnia «Tarpieda» — FK Maładziečna. Abvinavačanyja na mašynie padjechali na inšy prypynak, na Anharskaj.
Adzin z abvinavačanych, Filip Ivanoŭ admoviŭsia ŭdzielničać u dalejšym.
Ale inšyja dziejničali. Pa słovach prakurora, Kraŭčanka źniaŭ «rohi» tralejbusa z pravadoŭ. Bojka raźbiŭ šybu ŭ zadniaj dźviery tralejbusa. Ciechanovič i Vałavik abražali, zapałochvali i źbivali fanataŭ «Tarpieda», raspylili «nieŭstanoŭlenaje razdražniajučaje rečyva» ŭ sałonie. Adnamu z paciarpiełych parvali majku i kurtku.
Akramia taho, prakuror ahučyŭ za što zatrymanyja Kraŭčanka i Čartovič. Pa viersii śledstva, u mai 2015 hoda Kraŭčanka i Čartovič jany pradali 1,5 hrama marychuany znajomamu. A ŭ lutym 2016 hoda Čartovič nabyŭ sabie hašyš. Častku ŭžyŭ, častku pierapradaŭ Kraŭčanku — jaje i znajšli ŭ taho paźniej pry vobšuku.
Illa Vałavik pryznaŭ vinu častkova (kiraŭnictva niezarehistravanaj arhanizacyjaj jon admaŭlaje). Častkova pryznali vinu i Vadzim Bojka, Filip Ivanoŭ. Dźmitryj Ciechanovič pryznaŭ vinu całkam, Andrej Čartovič — całkam admoviŭ. Častkova pryznaŭ i Kraŭčanka — bojka była, narkotyki byli, ale ich jon nie pradavaŭ.
Darečy, niekatoryja z abvinavačanych užo majuć sudzimaści. Illa Vałavik byŭ asudžany na hod i 6 miesiacaŭ z adterminoŭkaj za złosnaje chulihanstva, taksama termin z adterminoŭkaj atrymlivaŭ i Kraŭčanka.
Praces praciahniecca ŭ paniadziełak 6 lutaha.
