U śfiery ideałahičnaj pracy ŭ dziaržavie važna admovicca ad usiaho pakazušnaha i nadumanaha. Ab hetym Alaksandr Łukašenka zajaviŭ siońnia na naradzie pa aptymizacyi Administracyi prezidenta Biełarusi, piša BiełTA.
«Treba praciahnuć udaskanaleńnie nacyjanalnaj ideałohii. Heta adna z hałoŭnych umoŭ stabilnaści ŭ hramadstvie i asnova dla dalejšaha raźvićcia. Važna admovicca ad usiaho pakazušnaha i nadumanaha. Ni ŭ jakim razie nie pavinna być niejkich farmalnych i niepatrebnych mierapryjemstvaŭ», — zapatrabavaŭ jon.
Pavodle słoŭ Łukašenki, nieabchodna vybudavać sistemu ideałahičnaj raboty ŭ dziaržavie. «My niejak sprabavali heta zrabić, abapirajučysia i na vopyt savieckich časoŭ, pryznajučy adzinyja palityčnyja dni, ale ŭsio heta skaciłasia na rejki farmalizmu i dzikaj biurakratyi», — kanstatavaŭ Alaksandr Łukašenka.
Jon adznačyŭ, što ideałahičny rabotnik pavinien vałodać nie tolki viedami, ale i admysłovymi asabistymi jakaściami. «Heta ad pryrody adoranyja ludzi, jakija majuć peŭnuju charyzmu i mohuć nie tolki danieści da ludziej niešta pa temie, ale i ŭpłyvać na ich śviadomaść. Važna, kab heta byli jašče i kiraŭniki. Heta lišni faktar davieru ludziej da hetaha čałavieka, jaki budzie pierad imi vystupać», — skazaŭ Łukašenka.
Alaksandr Łukašenka dadaŭ, što ŭ ideałahičnaj pracy nieabchodna dziejničać pa pryncypie «lepš mienš, dy lepš». «Farmalizmu być nie pavinna», — padkreśliŭ jon.
