Sudovaja kalehija pa kryminalnych spravach Bresckaha abłasnoha suda 7 lutaha vyniesła prysud 64-hadovamu žycharu Kobrynskaha rajona za zabojstva 22-hadovaha žychara Žabinki.
Jak paviedamiła BiełaPAN pamočnik staršyni Bresckaha abłasnoha suda Maryna Skałkovič, piensijanier pryznany vinavatym u naŭmysnym supraćpraŭnym pazbaŭleńni žyćcia inšaha čałavieka (zabojstva) z chulihanskich mierkavańniaŭ (p. 13 č. 2 art. 139 KK), asabliva złosnym chulihanstvie (č. 3 art. 339 KK) i pryhavorany da 16 hadoŭ pazbaŭleńnia voli ŭ kałonii ŭzmocnienaha režymu.
Sudom vyrašany hramadzianski isk paciarpiełaj ab kampiensacyi maralnaj škody.
Prysud jašče nie nabyŭ zakonnuju moc i moža być abskardžany i apratestavany ŭ apielacyjnym paradku.
Złačynstva było ŭčyniena 6 žniŭnia 2016 hoda ŭ kramie ŭ vioscy Hrušava Kobrynskaha rajona. Piensijanier ŭ stanie ałkaholnaha apjanieńnia pahražaŭ kampanii maładych ludziej, adnamu ź jakich nanios udar nažom u vobłaść hrudnoj kletki.
U vyniku kołata-rezanaha ranieńnia 22-hadovy žychar Žabinki pamior na miescy. Z maładym čałaviekam fihurant kryminalnaj spravy znajomy nie byŭ.
Sa słoŭ vidavočcaŭ, nichto z kampanii maładych ludziej piensijaniera nie pravakavaŭ.
Supracoŭniki pravaachoŭnych orhanaŭ zatrymali viaskoŭca pa miescy žycharstva, dzie jon piŭ vino i hladzieŭ televizar. Pry sabie ŭ piensijaniera byŭ nož, na jaho adzieńni znojdzieny ślady kryvi zahinułaha.
