Televizijnyja sieryjały stanoviacca važnymi padziejami ŭ kulturnym žyćci śvietu. Ich abmiarkoŭvajuć i čakajuć navat bolš, čym paŭnamietražnyja filmy. Navat najlepšyja režysiory sučasnaści, jak, naprykład, Vudzi Alen ci Paoła Sarencina, nie hrebujuć zdymkami sieryjałaŭ. «NN» prapanuje vašaj uvazie mini-hajd pa najlepšych sieryjałach apošnich miesiacaŭ.
«Karona» (The Crown)
Drama, bijahrafija. ZŠA, Vialikabrytanija. 1-y siezon
Adznaka na IMDB: 8,9
Sieryjał «Karona» sioleta atrymaŭ «Załaty hłobus» jak najlepšy dramatyčny sieryjał 2016 hoda. A vykanaŭca hałoŭnaj roli Kłer Foj — jak najlepšaja aktrysa ŭ sieryjałach.
Zachodnija kiniematahrafisty praciahvajuć uviekaviečvać u žyćci sieryjały pra brytanskich manarchaŭ. Tolki vosieńniu źjaviŭsia pieršy siezon «Viktoryi», jak patokavy telekanał Netflix zapuściŭ «Karonu» pra karalevu Lizavietu II.
Darečy, vielmi cikava paraŭnać pavodziny hetych asob. Viktoryja z małych hadoŭ čakała śmierci svajho dziadźki Vilhielma IV, kab uzyści na tron. Dla Lizaviety sychod jaje baćki Hieorha VI byŭ niečakany. Jana nie rychtavała siabie da karaleŭstva.
Tajnyja spružyny pałaca, intryhi i pieraškody, ź jakimi sutykałasia karaleva na svaim šlachu, — usio heta ŭ «Karonie». Vielmi cikavaja rola muža karalevy — hiercaha Filipa (kab ažanicca, jon admoviŭsia ad hreckaha pravasłaŭja na karyść anhlikanstva). Heta sapraŭdy ciažkaja noša — być u cieni svajoj žonki, zastavacca na druhich rolach. Moža, tamu Filip nie zaŭsiody pakazany ŭ pryvabnym śviatle.
Hety sieryjał varta hladzieć i dziela Džona Lithoŭ, jaki hienijalna vykanaŭ rolu Uinstana Čerčyla. Brytanski premjer źjaŭlajecca ŭ sieryjale va ŭsioj svajoj vialikaści i nikčemnaści.
«Vikinhi» (Vikings)
Histaryčnaja drama. Kanada, Irłandyja. 4-y siezon.
Adznaka na IMDB: 8,7
U centry sieryjała lehiendarny skandynaŭski konunh Rahnar Ładbrok. Vikinhi razumiejuć, što krainy Bałtyjskaha rehijona spustošanyja imi całkam. Dziela taho, kab vyžyć, treba adkryvać novyja kirunki dla nabiehaŭ. Ad kahości z padarožnikaŭ Rahnar čuje pra Anhliju i jaje bahaćci. Paśla hetaha Rahnar žyvie tolki dumkaj pra toje, jak nakiravacca tudy z voinami.
Katalicki biskup z Łos-Anželesa Robiert Bieran vykazaŭ mierkavańnie, što «Vikinhi» — samy cikavy telesieryjał apošniaha času dla viernikaŭ, choć i bolšaść hierojaŭ maryć pra Valchału i klaniecca ŭ viernaści Toru. Chryścijanstva prysutničaje ŭ asobie manacha Adelstana, jaki šukaje padychody da serca Rahnara. A pahanstva — u asobie budaŭnika karabloŭ Fłoki, adnaho z najcikaviejšych piersanažaŭ filma.
U sieryjale šmat kryvi i žorstkaści, ale nie sprabujcie tolki praz heta stavić na im kryž. Hetaje kino pra mužnaść, zdradu, vieru, adnosiny. A padziei nie dajuć zasumavać.
Rolu žonki Rahnara — niepaŭtornaj Łahierty — vykanała kanadskaja aktrysa Ketryn Uinik. Heta psieŭdanim, a sapraŭdnaje imia — Kaciaryna Vińnickaja. Jana naradziłasia ŭ Taronta, da vaśmi hadoŭ razmaŭlała tolki pa-ŭkrainsku, chadziła va ŭkrainskuju škołu.
«Małady papa» (The Young Pope)
Drama. Italija, Ispanija, Francyja. 1-y siezon
Adznaka na IMDB: 8,5
Pra hety sieryjał užo skazana stolki ŭsiaho, što dadać niešta vielmi ciažka. Jaho režysioram staŭ Paoła Sarencina, adzin z najbolš cikavych režysioraŭ sučasnaści. I Sarencina źjaŭlajecca adnym z hałoŭnych hierojaŭ filma na praciahu ŭsich dziesiaci sieryj. Časam nie stolki cikava nazirać za ihroj akcioraŭ, jak za režysiorskaj pracaj majstra. «Małady papa» pierapoŭnieny samymi roznymi detalami, vobrazami. Praz kožnyja paru siekund možna cisnuć na «stop», kab paŭziracca ŭ dekaracyi.
Što tyčycca siužetu, to małady amierykanski kardynał Leni Biełarda pa vynikach kankłavu stanovicca novym Papam. Jaho razhladajuć jak alternatyvu libieralnamu dziaržsakrataru Vatykana Andžele Vajele i charyzmatyčnamu kardynału-kansiervataru Majkłu Spenseru. Novy papa Pij XIII musiŭ stać cackaj u rukach starejšych kaleh, ale niečakana pačynaje hulać pa ŭłasnych praviłach.
Papa kuryć u Vatykanie, pryručaje kienhuru, pje «Koka-kołu», šantažuje italjanskaha premjer-ministra, nie viedaje, pra što razmaŭlać z pravasłaŭnym mitrapalitam, adšturchoŭvaje ad siabie viernikaŭ, jaho dajmajuć demany dziacinstva. Ale čym bolš pra jaho daviedvajucca ludzi, tym bolš jany razumiejuć, što Papa — śviaty. Voś tolki pytańnie, ci vieryć Pij XIII u Boha?
«Halijaf» (Goliath)
Jurydyčnaja drama. ZŠA. 1-y siezon
Adznaka na IMDB: 8,3
Hałoŭny hieroj — advakat-niaŭdačnik Bili Makbrajd. Kaliści jon byŭ suzasnavalnikam bujnoj advakackaj kantory, ale ŭ niejki momant žyćcio pasypałasia sabaku pad chvost. Ciapier Makbrajd raźviedzieny, žyvie ŭ mateli, hłušyć litrami ałkahol, a taksama pierabivajecca vypadkovymi spravami.
Taki stan rečaŭ praciahvajecca da toj pary, pakul Bili nie padvaročvajecca sprava ŭsiaho žyćcia — tajamničaja śmierć maładoha supracoŭnika abarončaha pradpryjemstva. Supraćstajać Bili ŭ hetaj spravie budzie jahony kolišni kampańjon — Donald Kupierman.
Zdavałasia b, šancaŭ nul. I kankurenty prosta rastruščać Bili, kali nie jurydyčna, to fizična dakładna. Ale jamu niejak atrymlivajecca naviazać baraćbu.
Varta adznačyć bliskučuju ihru Bili Bobi Torntana — vykanaŭcy hałoŭnaj roli. Mienavita jon atrymaŭ «Załaty hłobus» za najlepšuju mužčynskuju rolu ŭ sieryjałach za 2016 hod.
«Čałaviek u vysokim zamku» (The Man in the High Castle)
Alternatyŭnaja historyja, tryler. ZŠA. 2-i siezon
Adznaka na IMDB: 8,1
Davajcie ŭjavim situacyju: nacysty pieramahajuć u Druhoj suśvietnaj vajnie. ZŠA padzielenyja na try častki. Uschodniaje ŭźbiarežža kantraluje Hiermanija, zachodniaje — Japonija. Nievialikaja pałoska ziamli ŭ rajonie Skalistych hor utvaraje niejtralnuju terytoryju. Mienavita taki siužet stvaryŭ amierykanski fantast Filip Dzik.
Padziei adbyvajucca ŭ pačatku 1960-ch. Na ściahu ZŠA zamiest zoračak krasujecca svastyka, sastareły Hitler kiruje vialikaj impieryjaj apošnija dni. I ŭ Ńju-Jorku, i ŭ San-Francyska tlejuć ačahi supracivu. Padpolle kišyć špijonami, nikomu daviarać nielha.
Adzinuju nadzieju dajuć kinachroniki pieramohi nad nacyzmam, stvoranyja niejkim «Čałaviekam u vysokim zamku». Chto heta taki i dzie jon žyvie, nichto nie viedaje.
«Uzornyja buntarki» (Good Girls Revolt)
Histaryčnaja drama. ZŠA. 1-y siezon
Adznaka na IMDB: 8,1
Kaniec 1960-ch. Ńju-jorkski časopis «Naviny tydnia» ličycca adnym z samych papularnych i paśpiachovych u krainie. Žurnalistami ŭ časopisie pracujuć tolki mužčyny, ale da kožnaha ź ich prystaŭlenaja žančyna, jakaja dapamahaje ŭ zbory infarmacyi, abzvońvaje krynicy. Pisać samastojna artykuły žančynam zabaraniajecca. Navat ułaśnica vydańnia kaža: «Nie, miłački, vy pisać ničoha nie budziecie».
Niekalki pamočnic pačynajuć svaju baraćbu, spačatku tajemnuju, za pravy žančyn. U stvareńni sieryjału ŭziali ŭdzieł dastatkova talenavityja akciory. Modnikam budzie vielmi cikava pahladzieć, jak apranalisia, dzie pravodzili čas u Ńju-Jorku 1969 hoda. U hetym płanie film atrymaŭsia vielmi hustoŭnym.
Dziela spraviadlivaści varta adznačyć, što nie abyšłosia ŭ kino i biez hiendarnych pierahibaŭ. Ale ŭ cełym buntarak hladzieć varta chacia b dziela taho, kab pabačyć, jaki kałasalny prahres u pytańni pravoŭ žančyn byŭ dasiahnuty ciaham žyćcia adnaho pakaleńnia.
«Strałok» (Shooter)
Drama, bajavik. ZŠA. 1-y siezon
Adznaka na IMDB: 7,7
U Sietle rychtujecca zamach na žyćcio prezidenta ZŠA, ale ŭ čas mierapryjemstva kula znachodzić kiraŭnika Ukrainy, jaki i byŭ metaj złačyncaŭ. U zabojstvie abvinavačvajecca hienijalny snajpier Bob Li Svehier. Siaržant marskoj piachoty, jaki prajšoŭ praz Afhanistan. Litaralna niekalki čałaviek u śviecie stralaje lepš za Svehiera.
Zamknuty snajpier akazvajecca ŭ centry bujnych razborak pamiž rasijskimi śpiecsłužbami i amierykanskimi działkami. Zadača Boba Li — dakazać svaju nievinavataść.
Hladzi taksama:
Siem najlepšych sieryjałaŭ hetaha leta
Siem najlepšych sieryjałaŭ hetaj vosieni
«Małady papa»: sieryjał staŭ adnoj z hałoŭnych kulturnych padziej hoda
