Prezident Donald Tramp zajaviŭ, što paprasiŭ svajho daradcu pa nacyjanalnaj biaśpiecy Majkła Flina syści ŭ adstaŭku, bo jon nie byŭ zadavoleny tym, jak toj kantaktavaŭ ź vice-prezidentam ZŠA Majkam Piensam. Pra heta paviedamlaje Reuters.
«Ja nie dumaju, što jon zrabiŭ niešta nie tak», - skazaŭ Tramp. Pavodle jaho słoŭ, u kantaktach z rasijskimi čynoŭnikami Flin «sioje-toje rabiŭ pravilna».
Tramp taksama adznačyŭ, što nie prasiŭ Flina vieści pieramovy z pasłom Rasii ŭ ZŠA Siarhiejem Kiślakom pra sankcyi. Adnak daručyŭ b jamu vieści takija pieramovy, «kali b jon hetaha nie rabiŭ».
U aŭtorak, 14 lutaha, Majkł Flin syšoŭ z pasady daradcy pa nacyjanalnaj biaśpiecy. Jon vybačyŭsia pierad Trampam i Piensam za toje, što daŭ niapoŭnuju infarmacyju pra razmovy z rasijskim pasłom u Vašynhtonie Siarhiejem Kiślakom. Flin źviarnuŭ uvahu na toje, što jon nie całkam infarmavaŭ vice-prezidenta pra źmiest razmovy z pasłom z-za «chutkich padziej».
29 śniežnia administracyja Baraka Abamy ŭviała novyja sankcyi ŭ dačynieńni da Rasii, abvinavaciŭšy jaje va ŭmiašańni ŭ vybary prezidenta ZŠA. U toj ža dzień, pa dadzienych Reuters, Kiślak i Flin praviali piać telefonnych razmoŭ. Daradca Trampa raspavioŭ ab adnoj, adznačyŭšy, što sankcyi nie abmiarkoŭvalisia.
Adnak, pavodle infarmacyi The Washington Post, Flin abmiarkoŭvaŭ z Kiślakom sankcyi i padaŭ Maskvie «sihnał» ab mahčymym źmiakčeńni sankcyj suprać Rasii.
