Sud Centralnaha rajona Minska prysudziŭ byłych supracoŭnikaŭ spažyvieckaha kaapieratyva «Śpiektr-Kapitał», jaki prapanoŭvaŭ pazyki pad 70%, ale nie viartaŭ układčykam hrošy, da pazbaŭleńnia voli na termin ad 7 da 10 hadoŭ.
Staršynia praŭleńnia kaapieratyva Luboŭ Kašeŭskaja pryznanaja vinavataj pa č.4 art. 209 (machlarstva, ździejśnienaje hrupaj asob u asabliva bujnym pamiery), č.2. art. 235 (lehalizacyja materyjalnych kaštoŭnaściaŭ, nabytych złačynnym šlacham). Pa sukupnaści złačynstvaŭ joj pryznačana pakarańnie ŭ vyhladzie pazbaŭleńnia voli terminam na 10 hadoŭ z adbyvańniem pakarańnia ŭ kałonii ahulnaha režymu. U jaje kanfiskujuć majomaść.
Nadzieja Dubinskaja i Volha Traśko pryznanyja vinavatymi pa č.4 art. 209. Pieršaj pryznačana pakarańnie ŭ vyhladzie 8 hadoŭ pazbaŭleńnia voli z adbyvańniem pakarańnia ŭ kałonii ahulnaha režymu, z kanfiskacyjaj majomaści. Druhaja prysudžanaja da 7 hadoŭ pazbaŭleńnia voli z adbyvańniem pakarańnia ŭ kałonii ahulnaha režymu, z kanfiskacyjaj majomaści.
Akramia taho, usich fihurantak pryznali vinavatymi pa č.1 art. 427 (słužbovy padłoh). U adpaviednaści z p. 3 č.1 art. 29 KPK jany vyzvalenyja ad adbyćcia pakarańnia pa hetym artykule ŭ suviazi sa skančeńniem terminu daŭnaści. Jašče adzin udzielnik ašukanskaj schiemy - Alaksandr Hančaroŭ - znachodzicca ŭ vyšuku.
Nahadajem, mikrafinansavaja arhanizacyja składała damovy pazyki, abaviazvajučysia vypłačvać pracenty ŭ zaležnaści ad uniesienaj sumy, až da 70%. Adnak hrošy ludziam nie viartalisia — zamiest hetaha firma prapanoŭvała novuju damovu na bolš vyhadnych umovach, albo ŭkłaścisia ŭ vyhadnyja prajekty, naprykład, budaŭnictva šmatfunkcyjanalnaha administracyjna-haściničnaha kompleksu.
U vyniku ad dziejnaści finansavaj piramidy paciarpieli 220 čałaviek. Suma škody, naniesienaj padmanutym układčykam, pieravyšaje 20 miljardaŭ starych rubloŭ.
