Były načalnik upraŭleńnia adukacyi Mahiloŭskaha harvykankama Jaŭhien Dupleŭski, abvinavačany ŭ karupcyjnym złačynstvie i pamiłavany prezidentam, pryznačany dyrektaram himnazii №4 Mahilova, paviedamlaje BiełaPAN.
mahilyowspring.org
U lutym 2014 hoda abłasnaja prakuratura paviedamiła ab uzbudžeńni ŭ dačynieńni da čynoŭnika spravy pa častcy 2 artykuła 210 KK (kradziež šlacham złoŭžyvańnia słužbovymi paŭnamoctvami, učynieny paŭtorna abo hrupaj asobaŭ pa papiaredniaj zmovie). Śledstva vyjaviła, što Dupleŭski na praciahu čatyroch navučalnych hadoŭ, u 2010—2013 hadach, afarmlaŭsia ŭ škołu na pracu pa sumiaščalnictvie nastaŭnikam fakultatyŭnych zaniatkaŭ na ŭmovach terminovaha pracoŭnaha dahavora, pry hetym faktyčna takija zaniatki z navučencami nie pravodziŭ. U škole afarmlałasia fiktyŭnaja słužbovaja dakumientacyja, jakaja źjaviłasia padstavaj dla naličeńnia jamu zarabotnaj płaty i ažyćciaŭleńnia abaviazkovych adličeńniaŭ u biudžet na ahulnuju sumu kala 22 młn. niedenaminavanych rubloŭ. Paśla były čynoŭnik, pryznaŭšy svaju vinu ŭ kradziažach, padaŭ prezidentu prašeńnie ab pamiłavańni. Prašeńnie było zadavolena viasnoj 2015 hoda paśla kampiensacyi Dupleŭskim sumy vykradzienaha.
Paśla pamiłavańnia ŭ Mahilovie źjaviłasia niepaćvierdžanaja infarmacyja, što Jaŭhien Dupleŭski moža być pryznačany dyrektaram himnazii № 3. Baćki i blizkija navučencaŭ byli suprać takoha pryznačeńnia. Adzin ź ich — staršynia Mahiloŭskaj abłasnoj arhanizacyi AHP Uładzimir Šancaŭ źviartaŭsia z hetaj nahody da staršyni Mahiloŭskaha harvykankama Uładzimira Cumarava z prośbaj prajaśnić situacyju z mahčymym pryznačeńniem Dupleŭskaha dyrektaram himnazii № 3. Kiraŭnik horada adkazaŭ, što hetaje pytańnie nie razhladajecca, skazaŭ BiełaPAN Šancaŭ.
Jak paviedamili ŭ himnazii № 4, novuju pasadu Jaŭhien Dubleŭski zajmaje z pačatku studzienia 2017 hoda.
Uładzimir Šancaŭ vielmi niehatyŭna uspryniaŭ infarmacyju pra novuju pasadu Jaŭhiena Dupleŭskaha. «Karupcyjaniery nie mohuć siejać razumnaje, dobraje, viečnaje. Čahości patrabavać ad padnačalenych nastaŭnikaŭ jany nie majuć nijakaha maralnaha prava. Tym nie mienš pryznačeńnie adbyłosia. Heta zusim niahodnaja praktyka baraćby z karupcyjaj. Ja nie sumniavajusia, što dzieci pračytali pra jaho ŭsio, što napisana ŭ internecie. I što, jon budzie prykładam dla pierajmańnia?» — skazaŭ Šancaŭ.
Namieśnik dyrektara pa vychavaŭčaj rabocie himnazii № 4 Ała Prybaŭkina zajaviła BiełaPAN, što nie hatovaja vykazać svajo mierkavańnie adnosna pryznačeńnia Jaŭhiena Dupleŭskaha. Sam ža dyrektar, pavodle jaje słoŭ, znachodzicca ŭ kamandziroŭcy.
