Zabiahajučy napierad, adznaču: pryjemna ŭraziła, što bolšaść dobrych praduktaŭ — mienavita biełaruskaj vytvorčaści.
Čyrvonaja ryba
Ryba źjaŭlajecca najbahaciejšaj krynicaj amieha-3 tłustych kisłot, jakija biaruć udzieł u stvareńni novych kletak arhanizma, i minieralnych rečyvaŭ. Taksama jana na pieršym miescy pa kolkaści vitaminu D, jakoha tak brakuje ŭ našych šyrotach. Dobra jeści jaje chacia b raz-dva na tydzień. Akramia čyrvonaj ryby, ješcie i inšyja vidy marskoj ryby, asabliva pałtusa, trasku, a taksama piečań traski.
Alej ź lonu
Vielmi dobra ŭpłyvaje na repraduktyŭnyja žanočyja orhany, vyciaśniaje drenny chalesteryn i zaścierahaje ad aterasklerozu. Taksama lniany alej uklučajuć u kaśmietyčnyja pradukty: jon umacoŭvaje vałasy, paznohci, pavialičvaje ełastyčnaść skury. Plus jaho ŭ tym, što, u paraŭnańni z tym ža aliŭkavym, jon kaštuje mienš. Kali abirajecie alej, hladzicie na butelku: abirajcie ciomnuju, u joj jon lepš zachoŭvajecca.
Hrečaski johurt
Kali zadavacca metaj zaŭsiody vyvučać skład praduktu, možna ŭbačyć, što vytvorcy pichajuć cukar amal usiudy. Jano i zrazumieła: cukar chutka vyklikaje zaležnaść, i nam usio bolš chočacca kuplać smačnaści ź im (a norma ŭžyvańnia, darečy, usiaho 6 čajnych łyžak na dzień). Praźmiernaściu biełaha «narkotyku» hrašać johurty, a voś u hrečaskim jaho niama. Pradukt bolš čym naturalny: tolki małako i zakvaska. Dadatkovy bonus — u jaho pryjemnaja, hustaja kansistencyja, tamu jon zmoža zamianiać śmiatanu.
Tvaroh, dy kab tłusty
Kalcyj biez tłušču nie zasvojvajecca, tamu kali vy źjaścio abiastłuščany i navat adnapracentny tvaroh, to, pa-pieršaje, narmalna nie najaściesia, pa-druhoje, nie atrymajecie patrebnych karysnych rečyvaŭ. Tamu ja raju ŭsim svaim klijentkam, jakija chudniejuć, kuplać tvaroh z tłustaściu ad 2%, a ŭsim astatnim možna i bolšaj tłustaści.
Małočnyja kaktejli
Tut čysty białok. Kaktejl možna pić padčas pierakusu, takim čynam dajučy arhanizmu patrebnuju kolkaść białku. «Ekspanienta» kaštuje značna tańniej za admysłovyja prateinavyja kaktejli, a kupić jaje možna amal u kožnaj kramie.
Aŭsianaja kaša
Krupy — asnova asnoŭ, ź jakoj pavinien składacca racyjon. Uvieś sakret u składanych vuhlavodach, jakija źjaŭlajucca krynicaj enierhii. Jak dumajecie, čamu žančyny, jakija siadziać na białkovaj dyjecie, tak drenna vyhladajuć, jany niervovyja i ŭvieś čas nie zadavolenyja žyćciom? Heta im vuhlavodaŭ brakuje. Ja addaju pieravahu «Hierkulesu», a nie kamiakam nakštałt «Ekstra №3», jakija nie patrabujuć varki. U im minimalna apracavanaje ziernie z zachavanymi vitaminami, makra- i mikraelemientami.
Kukuruznyja šmatki
Vielmi časta na ŭpakoŭcy pišuć: biez cukru, dla tych, chto viadzie zdarovy ład žyćcia, robiać paznaki «fitnes» i h. d. Pry hetym u składzie možna vyjavić fruktozu — na spravie, amal taki samy dadadzieny cukar. Uvohule, raju nie vieścisia na modnyja nadpisy typu «arhaničny», «bija»: najčaściej heta markietynhavyja chitryki, kab pradać zvyčajny ci nie samy lepšy pradukt daražej.
Prosa
Kruciejšaje za rys ci hrečku bolšaj kancentracyjaj białku! Biarycie tyja pački, dzie niama śmiećcia, a ziarniatki vyklučna celnyja. Prosa idealna pasuje tym, u kaho prablemy sa straŭnikava-kišačnym traktam.
Makarona
Abirajcie vyklučna z muki ćviordych hatunkaŭ pšanicy (hrupa «A», hatunak vyšejšy). Dobraja padkazka — heta i vyhlad: jakasnaja makarona budzie bolš žoŭtaj i ščylnaj, a na praśviet nie mutnaj, a amal prazrystaj.
Fasola
Bahataja krynica mahniju i žaleza: adny z samych patrebnych elemientaŭ dla žančyn. Pry niastačy mahniju abvastrajucca ŭsie nastupstvy PMS. Kali vy chutka stamlajeciesia, jość pierapady z nastrojem: źješcie fasoli, ryby, zakusicie šakaładkaj — i budzie vam ščaście.
Chlabcy
Čym praściejšy skład, tym lepš. U hetych varyjantach utrymlivajecca celnaje ziernie pšanicy i žyta, žytniovy soład, krychu soli, zakvaska — i ŭsio.
Čorny chleb
Nie treba zusim vyklučać chleb z racyjonu! Kankretna ŭ žytniovym utrymlivajecca mnostva vitaminaŭ hrupy B. Zvažajcie na čarhovaść inhredyjentaŭ: tyja, jakich bolš, buduć na pačatku. Jašče važna ahledzieć upakoŭku: kali jana zamaślenaja, heta niezdarovy chleb. Niadrennyja varyjanty asabista dla mianie: «Vodar» ci žytniovy «Baradzinski».
Votrubje
Dobraja krynica raślinnaj klatčatki. Sama lublu i klijentkam rekamienduju taki voś recept na ich asnovie: žmienia votrubja, tvaroh i kiefir/iohurt. Padydzie jak varyjant na viačeru.
Horki šakaład
Čym bolš pracentaŭ kakava-baboŭ, tym lepš. Pry intelektualnych nahruzkach — heta prosta vyratavańnie. Taksama vydatny varyjant pierakusu: jak pa mnie, navat zahłušaje apietyt. Pamiž asnoŭnymi pryjomami ježy možna jašče pažavać arachisavuju chałvu, naprykład. Ale nie varta hrašyć z kolkaściu sałodkaha. Prablemy ž źjaŭlajucca nie z-za praduktaŭ, a ad ich praźmiernaha ŭžyvańnia.
Harodnina i sadavina
Zimoj ja rekamienduju kuplać zamarožanyja brokali i strukavuju fasolu. Staŭlu «łajk» avakada. Usiakija pamidory i ahurki ŭ nas u hety čas hoda, na žal, nie vielmi. Sadavinu taksama lepš abirać siezonnuju ci sušanuju: čarnaśliŭ, kuraha, finiki i žuraviny. Ja jašče lublu banany — krynica harmonu ščaścia, jakoha nam u vosieńska-zimovy pieryjad dakładna brakuje. Kali sustreniecie ŭ kramach, abaviazkova kuplajcie šypšynu — mienavita jana ŭtrymlivaje ŭ sabie bolš za ŭsio vitaminu S, a nie cytrusavyja, jak dumajuć mnohija. Taksama vitaminam S bahata lubimaja biełarusami bulba.
Cykoryja
Dla ŭsich, u kaho padvyšany cisk, jaje ŭžyvańnie — heta sapraŭdny łajfchak. I vydatny varyjant, kab adyści ad złoŭžyvańnia kavaj.
