Zasnavalnik Facebook Mark Cukierbierh miarkuje, što ŭžo ŭ chutkim časie štučny intelekt sacyjalnaj sietki zmoža raspaznavać patencyjnych terarystaŭ, hvałtaŭnikoŭ i samahubcaŭ. U svaim apublikavanym liście z padrabiaznym płanam raźvićcia Facebook jon paviedamiŭ, što na stvareńnie adpaviednych ałharytmaŭ moža spatrebicca niekalki hadoŭ.
Raniej ekśpierty źviartali ŭvahu na toje, što złačyncy pierad svaimi dziejańniami mohuć aktyŭna karystacca sacyjalnymi sietkami, tamu ich złačynstvy tearetyčna možna sprahnazavać.
«My raspracoŭvajem sistemu, jakaja b mahła analizavać tekst i vyjavy, kab pravieryć, ci nie zdarycca jakaja-niebudź niebiaśpieka. My budziem rabić usio, kab štučny intelekt moh adroźnivać naviny pra teraryzm ad terarystyčnaj prapahandy», — adznačyŭ zasnavalnik Facebook.
Cukierbierh pryznaŭ i pamyłki Facebook u vydaleńni sprečnaha kantentu.
Nahadajem, što sprečki i šyrokaje abmierkavańnie pravił sacsietki vyklikała vydaleńnie z Facebook znakamitaha fotazdymka Nika Uta časoŭ vjetnamskaj vajny «Žach vajny» sa staronki bujniejšaj u Narviehii haziety Aftenposten. Na hetaj vyjavie aholenaja vjetnamskaja dziaŭčynka biažyć ad napałmu, i administracyja sacyjalnaj sietki pabačyła tam dziciačuju parnahrafiju.
Zasnavalnik Facebook adznačyŭ, što kožny dzień praz sacyjalnuju sietku prachodziać miljardy paviedamleńniaŭ i publikacyj, tamu prosta fizična niemahčyma adsočvać kožny taki vypadak. Usie sprečnyja vypadki vydaleńnia kantentu Cukierbierh nazvaŭ «pamyłkami», jakija płanujecca vypravić novymi ałharytmami.
U kožnaj kultury i navat u kožnaj asoby svaje ŭjaŭleńni pra dazvolenyja miežy aholenaści, hvałtu i brydkasłoŭja, tamu zaŭsiody znachodzilisia niezadavolenyja praviłami Facebook. Novyja ałharytmy dazvolać samomu čałavieku vybirać, jakaja infarmacyja vartaja taho, kab patrapić u stužku. Taksama miežy dazvolenaha buduć zaležać ad rehijona, dzie znachodzicca čałaviek.
Dadzieny płan Cukierbierha padtrymali ekśpierty pa anłajn-biaśpiecy i pravaabaroncy, jakija raniej krytykavali sacyjalnuju sietku za cenzuru i nieprazrystyja praviły dla publikacyj.
