U sistemie biaśpieki sistemy EasyPay, imavierna, isnuje ŭraźlivaść, jakoj karystajucca finansavyja machlary, dapamahajučy narkahandlaram vyvodzić prybytki.
Dla spraščeńnia raźlikaŭ pamiž handlarami i spažyŭcami pieršyja vykarystoŭvajuć kašalki EasyPay, nie rehistrujučy ich samastojna, a bieručy «ŭ arendu» ŭ nieviadomych chakieraŭ.
Bolš padrabiazna čytajcie:
Jak handlary spajsami lehalizujuć sotni tysiač dalaraŭ
Ź nieviadomych pryčyn dostup da asobnych rachunkaŭ EasyPay ažyćciaŭlajecca nie praz aryhinalny sajt raźlikovaj sistemy, a praz staronku, stvoranuju machlarami — iwallet.pro.
Viedajučy numary rachunkaŭ — a ich narkahandlary zvyčajna nazyvajuć sami, kab klijent moh apłacić dozu, — možna zajści ŭ elektronnyja kašalki złačyncaŭ, minujučy pratakoł internet-biaśpieki ssl, prosta dadaŭšy ličbavy kod u pačatak adrasu sajta złačyncaŭ.
Karespandent «Našaj Nivy» «załahiniŭsia» ŭ adzin taki kašalok.
Najpierš, kab spraŭdzić, ci nie idzie havorka ŭsiaho tolki pra banalnaje kapijavańnie interfejsu, my zrabili dva pieravody na zhadany rachunak praź internet-bankinh — 2 i 1 rubli.
Pieravod na 2 rubli na rachunak EasyPay adlustroŭvajecca ŭ interfiejsie sajta złačyncaŭ.
Pieravody dajšli ciaham pary siekundaŭ.
Dla nas byli dastupnyja ŭsie standartnyja opcyi EasyPay. Ale viarnuć hrošy nazad niemahčyma praz strachujučuju sistemu — dla luboha pieravodu z kašalka nieabchodna viedać čatyrochznačny kantrolny kod, jaki vydajecca padčas rehistracyi kašalka i, možna mierkavać, jaho viedajuć tolki ŭłaśniki.
Taksama nam stali bačnyja ŭsie tranzakcyi kašalka złačyncaŭ — havorka idzie pra pieravody tysiač biełaruskich rubloŭ.
Apošniaje pastupleńnie datujecca nočču 19 lutaha — tady na rachunak pastupiŭ 31 rubiel. Z ulikam kamisii heta akurat zaviedzienaja cana na 2 hramy spajsa.
Ahułam havorka idzie pra sotni tysiač biełaruskich rubloŭ.
Apošnija tranzakcyi na adnym z kašalkoŭ, jaki zdadzieny ŭ «arendu» narkahandlaram nieviadomymi złačyncami.
Praŭda, my zabłakavali hety kašalok, trojčy ŭvioŭšy pamyłkovy kantrolny kod, a razam z hetym daviedalisia mabilny numar, na jaki jon zarehistravany: heta +375 29 8323981 (numar niedasiažny).
Jak patłumačyli «Našaj Nivie» ŭ «Biełhazprambanku», kazać pra ŭzłom sistemy nie vypadaje.
«Bank i EasyPay viedali pra naŭmysnaje vykarystańnie identyfikacyjnych kašalkoŭ EasyPay trecimi asobami, dostup da jakich ažyćciaŭlaŭsia praz proksi-siervier sa śpiecyjalnaj staronki. Bankam jašče na pačatku lutaha pryniatyja zachady pa infarmavańni kampietentnych orhanaŭ ab isnavańni dadzienaj situacyi, za aktyŭnaściu na dadzienaj staroncy ažyćciaŭlaŭsia manitorynh», — skazali ŭ banku
i padkreślili, što tema, padniataja «Našaj Nivaj», nie datyčyć pytańniaŭ biaśpieki banka i ŭzłomu elektronnych kašalkoŭ, bo ŭkazanaja schiema mahła isnavać tolki ŭ vypadku raskryćcia infarmacyi ab kašalkach ichnimi ŭłaśnikami.
U banku padkreślivajuć, što nivodnaja sistema niepasredna «Biełhazprambanka» ŭzłamana nie była, bo EasyPay — heta sumiesny prajekt «Biełhazprambanka» i TAA «Adkryty kantakt», dzie bank vystupaje tolki emitentam.
«Pracesinh elektronnych hrošaj EasyPay ažyćciaŭlaje TAA «Adkryty kantakt», jakomu naležyć handlovaja marka EasyPay i sajt, dzie ažyćciaŭlajecca kiravańnie kašalkami. AAT «Biełhazprambank» źjaŭlajecca partnioram TAA «Adkryty kantakt» i ažyćciaŭlaje emisiju i raźliki pa elektronnych hrošach», — adznačyli ŭ banku.
* * *
Abnoŭlena 22 lutaha:
Čytajcie taksama: Paśla publikacyj «Našaj Nivy» prodaž spajsaŭ u krainie paralizavany
