Jeŭrazijskaja ekanamičnaja kamisija ŭ pytańniach ahrapramysłovaha kompleksu i techničnaha rehulavańnia łabiruje intaresy Biełarusi i ihnaruje rasijskija prapanovy. Z takim abvinavačańniem vystupiŭ kiraŭnik Raśsielhasnahladu Siarhiej Dankviert, piša Jeŭraradyjo sa spasyłkaj na rasijskaje vydańnie «Iźviestija».
Dankviert paviedamiŭ, što prapanovy Raśsielhasnahladu nakont techničnaha rehulavańnia sutykajucca ź biaździejnaściu adkaznych čynoŭnikaŭ JEEK. Jak prykład jon zhadaŭ pastaŭki małaka i małočnaj pradukcyi. Zhodna z techrehłamientam, suchoje małako zabaroniena vykarystoŭvać u jakaści pitnoha. Pavodle mietodyki, jakuju zaćvierdziła JEEK, vyjavić najaŭnaść suchoha małaka ŭ pitnym składana. Ale pravierki bujnych biełaruskich pierapracoŭščykaŭ małaka, jakija pravioŭ Raśsielhasnahlad, pakazali, što amal va ŭsich probach jość suchoje małako, a ŭ niekatorych jaho dola składaje kala 50%.
Pa słovach Dankvierta, u Jeŭrasajuzie dla taho, kab praź jakuju-niebudź krainu nie prajšła zabaronienaja pradukcyja, pasiadžeńni adpaviednych pradstaŭnikoŭ źbiralisia kožnyja dva tydni. Ich rašeńni dazvalali pierakryć niesumlennyja ci niezakonnyja kanały pastavak. «Ale naša Jeŭrazijskaja kamisija pytańni razhladaje nie kožnyja dva tydni i navat nie kožnyja paŭhoda. I zrazumieła, što hetaha damahčysia niemahčyma, kali klučavyja pasady, jakija vyznačajuć techničnaje rehulavańnie, sielskaja haspadarka, zajmajuć našy biełaruskija kalehi», — aburyŭsia kiraŭnik Raśsielhasnahladu.
U JEEK žurnalistam raspaviali, što apošnija narady nakont źmienaŭ techrehłamientu pa biaśpiecy charčovaj pradukcyi prachodzili ŭ červieni 2016 hoda. Na ich nie ŭłdałosia dasiahnuć uzhodnienaj pazicyi. Kali projdzie nastupnaja narada na hetuju temu, u JEEK nie ŭdakładnili.
Darečy, hiendyrektar kansałtynhavaj kampanii Petrova Five Consulting Maryna Piatrova adznačyła, što 78% impartnych pastavak syru ŭ Rasiju idzie ź Biełarusi, a dola Biełarusi ŭ pastaŭkach suchoha małaka — 96%. Ahułam kala 90% ekspartu biełaruskaj małočnaj pradukcyi prypadaje na Rasiju.
