U padmaskoŭnym parku «Patryjot» budujecca kopija Rejchstaha — histaryčnaha budynka ŭ centry Bierlina, dzie z 1999 hoda prachodziać pasiadžeńni bundestaha. «Padmaskoŭny Rejchstah» budzie vykarystoŭvacca dla vajennych hulniaŭ «junarmiejcaŭ», udzielnikaŭ stvoranaha ŭ 2015 hodzie vajenna-patryjatyčnaha ruchu. Pra heta ŭ sieradu abviaściŭ ministr abarony Rasii Siarhiej Šajhu.
Budynak Rejchstaha ŭ Bierlinie
«U parku «Patryjot» budujem Rejchstah. Nie ŭ poŭnym vyhladzie, ale dla taho, kab našy junarmiejcy mahli šturmavać nie što papała, a kankretnaje miesca», — skazaŭ Šajhu.
Ułady FRH pakul nijak nie prakamientavali zajavu ministra abarony RF. Zrešty, jaho prajekty pa patryjatyčnym vychavańni padrastajučych pakaleńniaŭ rasijan nie abmiažoŭvajucca adnym tolki «šturmam Rejchstaha», paviedamlaje DW.
Akramia Rejchstaha, u parku pabudavanaja partyzanskaja vioska. «U joj jość kłas padrychtoŭki padryŭnikoŭ, kuchnia, kuchary, partyzanskaja łaźnia i navat ziamlanka zampalita», — adznačyŭ rasijski ministr. Z partyzanskaj vioskaj budzie susiedničać linija frontu z akopami i blindažami, dzie možna budzie adčuć atmaśfieru vajenna-palavoha žyćcia.
«Sioleta źjavicca mahčymaść pravieści dzień na słužbie na padvodnaj łodcy ŭsioj siamjoj i vyprabavać usio, što tam adbyvajecca, pačynajučy z baraćby za vyžyvańnie i zakančvajučy kampotam i makaronami pa-fłocku», — paviedamiŭ Šajhu.
