Hazieta Ivanaŭskaha rajona Bresckaj vobłaści ad 2017 hoda źmianiła nazvu z «Čyrvonaj źviazdy» na «Janaŭski kraj». Mininfarmacyi Biełarusi zaćvierdziła novuju nazvu.
Nazvu abrali čytačy na sajcie vydańnia, zatym jaje zaćvierdzili ŭ rajvykankamie. Janaŭ abo Janova — heta miascovaja nazva Ivanava.
Zasnavanaja ŭ 1943 hodzie hazieta raniej nasiła nazvy «Partyzan Paleśsia», «Kamunist», «Stalinskij puť». Nahodaj da pierajmienavańnia stała likvidacyja ŭ Biełarusi drotavaha radyjo: nieaktualnaj stała druhaja pałova nazvy ustanovy — «Redakcyja haziety «Čyrvonaja źviazda» i prahramy radyjoviaščańnia «Havoryć Ivanava».
«Heta była maja takaja radykalnaja inicyjatyva, — raskazaŭ hałoŭny redaktar Ihar Hietman. — Možna było prosta adkinuć «Havoryć Ivanava» i pakinuć «Čyrvonuju źviazdu». Ale ja vyrašyŭ apytać čytačoŭ, nakolki aktualna zachoŭvać «Čyrvonuju źviazdu» — i ci nie lepiej pryviazać nazvu da miascovych realijaŭ. Pačałasia doŭhaja žyvaja dyskusija, pisali listy, telefanavali, pisali na sajt.
Što samaje cikavaje, nie było nivodnaj surjoznaj prapanovy sa słovam «Ivanava», usio išło sa słovam «Janaŭ» — «Janaŭski prastor» i «Janaŭski kraj» najbolš. I kali prapanavali čytačam takija varyjanty nazvy, nichto nie zapiarečyŭ z čytačoŭ. Zrabili taki analiz: akazałasia, pałova arhanizacyj u horadzie nazyvajuć siabie sa słovam «Janaŭ», a nie «Ivanava».
My tut nie byli pieršaprachodcami — ale ŭpieršyniu na aficyjnym uzroŭni «Janaŭ» viarnuŭsia ŭ nazvu. Vy ž razumiejecie, zasnavalniki — rajvykankam i rajsaviet. I adnahałosna prahałasavali za hetuju nazvu, 29 śniežnia było pasiedžańnie vykankama i rajsavieta, dyk navat apładysmienty prahučali, bo momant histaryčny byŭ».
«Janaŭski kraj» vychodzić pa aŭtorkach i piatnicach nakładam u 6800 asobnikaŭ, padpiska na miesiac kaštuje 4 rubli, možna padpisacca i na PDF-viersiju.
