Dyjeta, jakaja imituje haładańnie, spryjaje adnaŭleńniu kletak padstraŭnikavaj załozy, śćviardžajuć amierykanskija daśledniki. Nizkakałaryjnaja dyjeta, jakaja składajecca ź nizkavuhlavodnych i nizkabiałkovych praduktaŭ z vysokim utrymańniem tłuščaŭ, «pierazahružaje» arhanizm i aktyvuje ŭ kletkach padstraŭnikavaj załozy miechanizm rehienieracyi. Na dumku miedykaŭ, adkryćcio moža dapamahčy ŭ baraćbie z dyjabietam, piša VVS.
Getty
Daśledavańnie navukoŭcaŭ z Univiersiteta Paŭdniovaj Kalifornii, apublikavanaje ŭ časopisie Cell, zasnavanaje na ekśpierymientach nad myšami. Paddoślednych maryli hoładam na praciahu niekatoraha času, a zatym viartali da narmalnaj dyjety.
Dyjetu vypraboŭvali i na ludziach — na praciahu piaci dzion paddoślednyja jeli tolki nizkavuhlavodnyja i nizkabiałkovyja pradukty z vysokim utrymańniem tłuščaŭ, a zatym na praciahu 25 dzion im dazvalali jeści ŭsio, što zaŭhodna. Pa zadumie navukoŭcaŭ, taki režym pavinien imitavać pieryjady haładańnia.
Jak zaŭvažyli navukoŭcy, u pieryjad haładańnia ŭ kletkach padstraŭnikavaj załozy ŭ myšej aktyvizavaŭsia asablivy miechanizm rehienieracyi. Padobny praces adbyvajecca ŭ stvałavych kletkach, i miedyki ŭžo dosyć daŭno tłumačać jaho isnavańnie zdolnaściu čałaviečych orhanaŭ častkova adnaŭlacca.
Adnak da hetaha času nie było viadoma, jakim čynam možna zadziejničać hety miechanizm, i nikomu nie prychodziła ŭ hałavu źviazvać jaho aktyvizacyju z haładańniem.
«My pryjšli da vysnovy, što kali davieści myšej da stanu krajniaha stresu šlacham haładańnia, a zatym, pakarmiŭšy, viarnuć nazad u narmalny stan, u kletkach padstraŭnikavaj załozy pačynaje dziejničać niejki miechanizm pa pieraprahramavańni kletak, jaki adnaŭlaje nie funkcyjanujučyja častki orhanaŭ», — kamientuje daśledavańnie adzin ź jaho aŭtaraŭ, doktar Valter Łonha.
«U navukovym sensie adkryćcio vielmi važnaje: my dakazali, što pieraprahramavać kletki možna z dapamohaj dyjety, nie źviartajučysia da madyfikacyi hienaŭ», — dadaje Łonha.
U miedycynskaj śfiery znachodka moža dapamahčy pierš za ŭsio ŭ baraćbie z dyjabietam — u paddoślednych myšej rezka vyraŭnoŭvaŭsia ŭzrovień cukru ŭ kryvi. Patencyjna takaja dyjeta moža adnavić utvareńnie insulinu ŭ arhaniźmie čałavieka, likvidavaŭšy pryčynu chvaroby.
