Žurnalistaŭ šerahu viadučych suśvietnych ŚMI, u tym liku CNN, The New York Times i «Bi-bi-si», nie puścili na bryfinh dla presy ŭ Biełym domie.
Šon Spajsier, fota CBSNews
Na mierapryjemstva nie byli dapuščanyja taksama karespandenty BuzzFeed, The Daily Mail, The Hill, The Los Angeles Times i The New York Daily News. Reparciory ahienctva The Associated Press i časopisa Time ŭ znak pratestu bajkatavali mierapryjemstva.
Na mierapryjemstva dapuścili pradstaŭnikoŭ šerahu inšych bujnych ŚMI, u tym liku telekanały ABC, CBS, NBC, Fox News, ahienctva Reuters i Bloomberg, a taksama kansiervatyŭnyja vydańni Breitbart i The Washington Times.
Jak piša The Hill, 24 lutaha žurnalistam paviedamili, što zamiest zvyčajnaj pres-kanfierencyi, na jakoj prysutničajuć usie pracujučyja ŭ Biełym domie reparciory, pres-sakratar Šon Spajsier praviadzie sustreču z «pašyranym pułam».
Farmat puła praduhledžvaje prysutnaść niekalkich žurnalistaŭ (zvyčajna pradstaŭlajuć roznyja vidy miedyja), jakija potym dzielacca materyjałam z kalehami; praca z pułam vykarystoŭvajecca, jak praviła, kali na mierapryjemstvie niama miesca dla vialikaj kolkaści ludziej. CNN adznačaje, što staŭ adzinym bujnym telekanałam, jaki nie dapuščany na mierapryjemstva dla «pašyranaha puła».
