Biełaruska-amierykanskaje zadzinočańnie (BAZA) zaklikała novuju administracyju ZŠA praciahvać akazvać padtrymku niezaležnaj suvierennaj Biełarusi, kirujučysia svaimi nacyjanalnymi intaresami ŭ adpaviednaści z demakratyčnymi kaštoŭnaściami.
Pra heta havorycca ŭ zvarocie BAZA da Džareda Kušniera, ziacia i starejšaha daradcy prezidenta Donalda Trampa. Jak padkreślivajecca ŭ zvarocie, siamja Kušniera maje suviazi ź Biełaruśsiu. Biełaruska-amierykanskaje zadzinočańnie prapanuje arhanizavać sustreču, kab prainfarmavać jaho i ab svajoj dziejnaści, i ab Biełarusi.
«BAZA, zasnavanaja ŭ 1949 hodzie, infarmuje ŭrad ZŠA pra apošnija padziei ŭ Biełarusi i prapanuje rekamiendacyi pa pytańniach palityki, — havorycca ŭ zvarocie. — Z momantu prychodu Uładzimira Pucina da ŭłady ŭ Rasii niezaležnaść Biełarusi znachodzicca pad pahrozaj, bo Kreml aktyŭna pašyraje svaju śfieru ŭpłyvu, padryvajučy prava susiednich narodaŭ na praviadzieńnie svajoj ułasnaj palityki. Jaskravym prykładam hetaha źjaŭlajecca aneksija Kryma Rasiejaj, jakaja demanstruje, što Kreml abviarhaje mižnarodnaje prava i kidaje vyklik intaresam ZŠA va ŭschodniaj Jeŭropie. Mnohija biełaruskija amierykancy aścierahajucca, što anieksija Biełarusi moža adbycca ŭ najbližejšaj budučyni».
Aŭtary zvarotu ličać, što «zachavańnie stratehičnych intaresaŭ Złučanych Štataŭ u Biełarusi maje pieršaradnaje značeńnie, a niezaležnaja budučynia Biełarusi pavinna atrymać naležnuju ŭvahu na samym vysokim uzroŭni». «Ekśpierty BAZA pry pieršaj ža mahčymaści mohuć vas prainfarmavać pra padziei ŭ Biełarusi i rehijonie, a taksama prakansultavać pa pytańniach dvuchbakovych adnosin pamiž Biełaruśsiu i ZŠA», — havorycca ŭ zvarocie.
Jak raniej paviedamlali amierykanskija ŚMI, svajaki Džareda Kušniera — uradžency z Navahrudka. Padčas Chałakostu jany biehli z Navahradskaha hieta i chavalisia ŭ biełaruskich lasach, dzie ŭdzielničali ŭ partyzanskim ruchu. Baćka Džareda Kušniera niekalki razoŭ naviedvaŭ Navahrudak, kudy pryvoziŭ unukaŭ, kab raspavieści im historyju siamji.
