Ukraina adznačaje 1020‑hodździe chryščeńnia Kijeŭskaj Rusi. Śviatkavańnie ładzicca na najvyšejšym dziaržaŭnym uzroŭni. Na zaprašeńnie prezydenta krainy Viktara Juščanki ŭ Kijeŭ naviedaŭsia Suśvietny (Kanstancinopalski) patryjarch Varfałamiej I, a taksama pradstaŭniki delehacyi zamiežnych cerkvaŭ, paviedamlaje ŭkrainski partał «Dieło».
Śviatkavańnie praciahniecca da 27 lipienia.
U piatnicu projdzie viačernia ŭ Safijskim sabory, aśviačeńnie zvanoŭ i Carskaj bramy. U subotu — uračystaści na Cafijskaj płoščy, panichida pa achviarach Haładamoru 1932‑33 hadoŭ. Ranicaj u niadzielu Varfałamiej I, jararchi i pradstaŭniki pravasłaŭnych miravych cerkvaŭ zładziać śviatočnuju liturhiju kala pomnika Śviatomu Ŭładzimieru.
Va ŭsich mierapryjemstvach planujecca ŭdzieł prezydenta Juščanki, jaki vykazaŭ mierkavańnie, što śviatkavańnie 1020‑hodździa chryščeńnia Kijeŭskaj Rusi pazytyŭna ŭpłyvaje na mižnarodny aŭtarytet Ukrainy.
Śviatkavańnie ŭ Kijevie supravadžajecca skandałam. Pryjezd va Ŭkrainu Varfałamieja I vyklikaŭ niezadavolenaść Ruskaj pravasłaŭnaj carkvy. Kiraŭnik RPC Aleksij II zaklikaŭ kiraŭnikoŭ inšych pamiesnych cerkvaŭ ihnaravać uračystaści 25‑27 lipienia. U adkaz na źjaŭleńnie ŭ Kijevie bihbordaŭ z vyjavaj Juščanki i Varfałamieja I, na vulicach horadu byli zaŭvažanyja bihbordy z vyjavaj maskoŭskaha patryjarcha i podpisam pa‑ŭkrainsku «Ŭkraina čakaje na svajho patryjarcha».
RPC vykazvaje zaściarohu pra čarhovy raskoł pravasłaŭja, spasyłajučysia na źviestki pra sustreču Ŭsialenskaha patryjarcha z kiraŭnikami niepryznanych ukrainskich cerkvaŭ. Nibyta ŭ Stambule patryjarch Ukrainskaj pravasłaŭnaj carkvy Kijeŭskaha patryjarchatu Fiłaret i kiraŭnik Ukrainskaj aŭtakiefalnaj pravasłaŭnaj carkvy mitrapalit Miafodzij abmiarkoŭvali z Varfałamiejem I mahčymaść stvareńnia adzinaj pamiesnaj carkvy va Ŭkrainie.
Taki varyjant całkam mahčymy, miarkuje staršynia Dziaržkamitetu pa spravach nacyjanalnaściaŭ i relihijaŭ Ukrainy Alaksandar Sahan. Dziela hetaha dastatkova, kab Kanstancinopal uziaŭ pad svaju apieku ŭkrainskija cerkvy i stvaryŭ ŭkrainskuju mitrapoliju.
