Niahledziačy na toje, što Nacyjanalny histaryčny muziej źjaŭlajecca spadkajemcam davajennaha Biełaruskaha dziaržaŭnaha muzieja i muzieja Minskaha carkoŭna-archieałahičnaha kamiteta, u jaho zborach praktyčna adsutničajuć rannija maniety Vialikaha Kniastva Litoŭskaha, narakajuć nieabyjakavyja supracoŭniki muzieja. Heta abumoŭlena šeraham pryčyn: pa-pieršaje, davajennyja numiztyčnyja zbory muzieja byli amal całkam stračany padčas akupacyi Minska (1941—1944); pa-druhoje, tyraž rańnielitoŭskich maniet byŭ nievialikim i bolšaja častka maniet znojdziena ŭ apošnija dziesiacihodździ, paśla masavaha źjaŭleńnia mietałašukalnikaŭ.
Na dadzieny momant u zborach muzieja jość 2 rańnielitoŭskija maniety:
1. Pieniaź, typ «źvier/kiryličny nadpis». Nabyta ŭ 2010 hodzie pry sponsarskaj padtrymcy AAT «Biełźniešekanombank». Biełaruski numizmat Dźmitryj Hulecki adnosić hetuju manietu da časoŭ Alhierda (lehienda na reviersie rasšyfroŭvajecca im jak OŁKHNRD).
2. Pieniaź, typ «dzida z kryžom/kalumny» — adna z samych masavych maniet. Adbita ŭ Vilni ŭ časy Vitaŭta Vialikaha (dar pryvatnaj asoby).
«U paraŭnańni sa zborami Ermitaža, muziejaŭ Vilni, Varšavy i Krakava kalekcyja NHMRB vyhladaje prykra i sumna. Ale my ŭ stanie źmianić heta», — pierakananyja muziejščyki.
U minułym hodzie muzieju prapanavali dla zakupki kallekcyju z 9 rańnielitoŭskich pieniaziaŭ.
1 manieta — litoŭskaja imitacyja hiulistanskaha danha Załatoj Ardy.
2 maniety — typ «šaścikancovy kryž/źvier».
6 maniet — partretnyja denaryi, Jahajła.
Ahulny košt maniet składaje 7200 rubloŭ.
Pry ŭdałym zakančeńni akcyi maniety buduć prezientavany hramadstvu i raźmieščany ŭ adnoj ź vitryn na ekspazicyi «Staražytnaja Biełaruś», zamiest mulažoŭ hryvien. U budučyni jany ŭpryhožać numizmatyčny kabiniet NHMRB.
