Na sudzie 24-hadovy žychar Baranavič skazaŭ, što «bolš nie budzie ŭchilacca ad vajskovaj słužby, bo, zrazumieła, lepiej pajści ŭ vojska, čym siadzieć u turmie».
Jak pieradaje vydańnie intex-press.by, abvinavačany nie źjaŭlaŭsia ŭ vajenkamacie bolš za try hady — z 2013 hoda. U 2013 i 2014 hadach u jaho była adterminoŭka ad armii, tamu što jon vučyŭsia ŭ licei budaŭnikoŭ. Potym aformiŭ adterminoŭku, tamu što ŭ jaho baćki była druhaja hrupa invalidnaści. Nieŭzabavie baćku pieraviali na treciuju hrupu invalidnaści, i padčas viasnovaha pryzyvu 2015 hoda abvinavačvany pad rośpis atrymaŭ pozvu ŭ vajenkamat.
Małady čałaviek u vajenkamat nie źjaviŭsia i daviedku ab uvažlivych pryčynach niajaŭki nie pradstaviŭ. Jon pajechaŭ na zarobki ŭ Rasiju, tamu što, jak patłumačyŭ abvinavačany ŭ sudzie, u siamji «było ciažkaje stanovišča». U vieraśni, kali haradžanin nienadoŭha pryjechaŭ dadomu, jamu znoŭ uručyli pozvu ŭ vajenkamat. Ale jon źjechaŭ u Rasiju.
U krasaviku 2016 hoda chłopca abviaścili ŭ vyšuk. Kali jon pryjechaŭ u Baranavičy na navahodnija śviaty, jaho zatrymali milicyjanty.
Na papiarednim śledstvie małady čałaviek rastłumačyŭ niajaŭku ŭ vajenkamat tym, što «nie paličyŭ patrebnym prychodzić, tamu što jamu treba było zarablać hrošy». U sudzie — što «nie dumaŭ, što ŭsio tak surjozna».
Dziaržabvinavaŭca Ludmiła Piatruška zaprasiła dla abvinavačanaha pakarańnie ŭ vyhladzie troch miesiacaŭ aryštu. Sam abvinavačvany zamiest aryštu paprasiŭ štraf.
Sud Baranavickaha rajona i horada Baranavičy 7 sakavika pryznaŭ haradžanina vinavatym va ŭchileńni ad mierapryjemstvaŭ pryzyvu na vajskovuju słužbu (č. 1 art. 435 KK RB) i prysudziŭ jaho da dvuch miesiacaŭ aryštu. Pakolki abvinavačany znachodziŭsia pad vartaj z 3 studzienia hetaha hoda i hety čas jamu zaličyli ŭ termin pakarańnia, chłopca adpuścili ŭ zale suda.
