AP
Košt travieńskaha fjučarsa na naftu marki Brent ŭpała ŭ paniadziełak, 13 sakavika amal na 1% i ŭpieršyniu ź listapada 2016 hoda apuściłasia nižej za $ 51 za baral. Za try papiarednija handlovyja siesii nafta patańnieła amal na $5 za baral.
U chodzie tarhoŭ na Łondanskaj biržy ICE košt fjučarsa na naftu paŭnočnamorskaj marki Brent z pastaŭkaj u mai 2017 hoda apuściŭsia na 0,92% i skłała $ 50,85 za baral, abnaviŭšy tym samym minimum z kanca listapada minułaha hoda. Pra heta śviedčać dadzienyja tarhoŭ.
Pa stanie na 08:28 baral tarhujecca pa 51,05 dalara.
U hety ž čas košt travieńskich fjučarsaŭ paŭnočnaamierykanskaj nafty WTI apuściŭsia da $48,5.
Ceny na naftu pačali svajo padzieńnie 8 sakavika paśla publikacyi uradavych dadzienych Ministerstva enierhietyki ZŠA ab zapasach nafty ŭ krainie, a taksama pra toje, što skaračeńnie zdabyčy krainami — členami APIEK i krainami, jakija dałučylisia da pahadnieńnia kartela, akazałasia niedastatkovym dla skaračeńnia pastavak nafty ŭ ZŠA. Z 8 pa 10 sakavika košt travieńskaha fjučarsa Brent źniziŭsia amal na $5.
Ceny na naftu padnialisia paśla taho, jak u listapadzie 2016 hoda było dasiahnuta pahadnieńnie ab stabilizacyi naftavaha rynku. Tady krainy-členy APIEK damovilisia skaracić zdabyču nafty na 1,2 młn bar. u dzień sa studzienia 2017 hoda. Da damoŭlenaściaŭ taksama dałučyŭsia šerah krain, jakija nie ŭvachodziać u arhanizacyju, u tym liku i Rasija. Jany ŭziali na siabie abaviazacielstvy skaracić zdabyču na 558 tys. baralaŭ u dzień.
Čarhovy samit APIEK, na jakim členy kartela, jak čakajecca, razhledziać pytańnie ab padaŭžeńni terminu dziejańnia abmiežavańniaŭ na naftazdabyču, projdzie ŭ Vienie 25 maja 2017 hoda
