Paŭtara hoda źniavoleńnia z adterminoŭkaj na hod — taki vyrak vynies siońnia Słaŭharadzki sud 90-hadovamu pensijaneru Fieliksu Škirmankovu.
Jaho pazbavili na piać hadoŭ pravoŭ kiroŭcy i abaviazali kampensavać maralnyja straty paciarpiełaj ad darožna-transpartnaha zdareńnia, jakoje adbyłosia pa jahonaj vinie. Akramia taho, jon aštrafavany na 30 bazavych vieličyniaŭ za toje, što parušyŭ praviły darožnaha ruchu, stvaryŭšy tym samym avaryjnuju sytuacyju. Škirmankoŭ maje apłacić sudovyja vydatki i vydatki, źviazanyja z praviadzieńniem ekspertyzaŭ.
Śledztva vyśvietliła, što letaś 9 listapada Fieliks Škirmankoŭ, jedučy na svajoj mašynie, źbiŭ žančynu na rovary. Taja ŭpała i złamała sabie ruku. Kiroŭca ź miesca zdareńnia źjechaŭ.
Fieliks Škirmankoŭ abaviazany vypłacić paciarpiełaj 5 tysiač rubloŭ maralnaj kampensacyi. Abvinavačany nastojvaŭ u sudzie, što hetaja suma zavialikaja i nie vyklučaje, što budzie jaje abskardžvać. Jon hatovy vypłacić joj 1 tysiaču rubloŭ. Razam z tym u apošnim svaim słovie jon vybačyŭsia pierad žančynaj. Paciarpiełaja nia zdoleła arhumentavać, čamu zapatrabavała ad adkazčyka 5 tysiač kampensacyi.
Fieliks Škirmankoŭ nie pryznaŭ svajoj viny ŭ tym, što jon źjechaŭ ź miesca zdareńnia, kab uniknuć pakarańnia. Pavodle jaho, vyjaždžajučy na hałoŭnuju darohu, jon ledźvie nie sutyknuŭsia ź inšaj mašynaj. Jahonaja ŭvaha była zasiarodžanaja na hetym epizodzie, a najezdu na ravarystku jon nie zaŭvažyŭ, tamu i źjechaŭ ź miesca avaryi.
Razam z tym sudździa Alaksandar Kurylin pryznaŭ Škirmankova vinavatym u parušeńni praviłaŭ darožnaha ruchu, u vyniku jakoha čałavieku praź nieaściarožnaść było naniesiena ciažkaje cialesnaje paškodžańnie. Za hety epizod staroha pakarali hodam pazbaŭleńnia voli. Šaściu miesiacami źniavoleńnia sudździa Kurylin pakaraŭ pensijanera za toje, što toj źjechaŭ ź miesca darožna-transpartnaha zdareńnia, pakinuŭšy paciarpiełuju ŭ niebiaśpiečnym dla jaje zdaroŭja stanie.
10 sakavika, u pieršy dzień sudovaha razboru, rajonny sud zadavoliŭ chadajnictva Fieliksa Škirmankova ab admienie pastanovy na aryšt majomaści, vyniesienaj staršym śledčym u asabliva važnych spravach adździełu vykryćcia złačynstvaŭ suprać biaśpieki ruchu Śledčaha kamitetu Mahiloŭskaj vobłaści Paźniakovym.
Pad aryšt trapiŭ bankaŭski rachunak, na jaki Škirmankovu pieraličvali pensiju. U vyniku 90-hadovy pensijaner miesiac žyŭ na dapamohu siabroŭ i razavuju materyjalnuju vypłatu z fondu sacyjalnaj dapamohi.
Razam tym na bankaŭskim rachunku Fieliksa Škirmankova zablakavanymi zastalisia jahonyja aščadžeńni na sumu bolš jak čatyry z pałovaj tysiačy rubloŭ.
