Alaksandr Łukašenka ŭzhadniŭ pryznačeńnie namieśnikaŭ staršyni Minskaha harvykankama.
Pasadu pieršaha namieśnika staršyni Minskaha harvykankama zojmie Fiodar Rymašeŭski. Da hetaha času jon zajmaŭ pasadu hienieralnaha dyrektara dziaržaŭnaha vytvorčaha abjadnańnia «Minskbud».
Na pasady namieśnikaŭ staršyni Minskaha harvykankama ŭzhodnienyja Alaksandr Krepak i Ihar Jurkievič. Raniej jany ŭznačalvali adpaviedna administracyju Maskoŭskaha rajona stalicy i kamitet pa achovie zdaroŭja Minskaha harvykankama.
Łukašenka taksama ŭzhadniŭ pryznačeńnie Andreja Žajłoviča kiraŭnikom administracyi Maskoŭskaha rajona Minska.
Alaksandr Łukašenka adznačyŭ, što siońnia horad funkcyjanuje jak śled, adnak uzrovień raźvićcia stalicy moh by być na paradak vyšejšy. Dla hetaha kiraŭnik krainy daručyŭ vyrašyć try hałoŭnyja zadačy: ŭrehulavać cenavuju palityku, zabiaśpiečyć rost zarabotnaj płaty i vyrašyć prablemu zaniataści nasielnictva.
«Nijakaha biespracoŭja być nie pavinna. Tym bolš što, pačynajučy ź viasny, pracy ŭ Minsku choć adbaŭlaj. Siońnia treba zadziejničać usich, chto chodzić biez pracy. Usich, — padkreśliŭ kiraŭnik dziaržavy. — Tym, chto choča ŭładkavacca na pracu i moža pracavać, treba dapamahčy. Chto nie choča (takich usio-taki krychu), treba prymusić pracavać. Tamu zrabicie ŭsio, kab pa maksimumie zaniać ludziej».
Što tyčycca ŭzroŭniu zarabotnaj płaty, to, na dumku Łukašenki, kazać pra siaredni zarobak u Minsku ŭ $ 500 prosta śmiešna. U stalicy jon pavinny być značna vyšejšy, čym u rehijonach. Tady heta padciahnie i siaredni zarobak pa krainie.
«Zrazumieła, što rašeńnie hetych zadač paciahnie za saboj i vyrašeńnie inšych. Dapuścim, jakoje pavyšeńnie zarabotnaj płaty biez pavyšeńnia pradukcyjnaści pracy? Tamu pavyšeńnie zarpłaty - heta pavyšeńnie pradukcyjnaści pracy. U rešcie rešt heta (hledziačy dzie i jak) pavyšeńnie abjomaŭ vytvorčaści. A kab mieć hrošy, heta treba pradać. heta ceły łancužok. Ale my pavinny vyrašyć hetuju zadaču. i mnohaje ŭ krainie budzie zaležać ad taho, jak žyvie i pracuje Miensk. Tamu biarycie styrny kiravańnia ŭ svaje ruki i pačynajcie dziejničać, - pastaviŭ zadaču Alaksandr Łukašenka. - Biaździejnaść ja nie paciarplu. Ja vam kažu ščyra: ci vy pačynajecie dziejničać i dajecie vynik, vykonvajecie daručeńni prezidenta, ci ja budu prymać rašeńni, prytym samyja surjoznyja».
