Za palityčnymi padziejami, chapunami i sudami ŭ Biełarusi i Rasii niejk nie zaŭvažyli my, što ŭčora adbylisia vybary ŭ łandtah Saara. Vyniki hetych vybaraŭ, a taksama vybaraŭ ziamielnyja parłamienty Šleźvih-Holštajna i Paŭnočnaha Rajna — Viestfalii, jakija majuć adbycca 7 i 14 traŭnia, ličacca svojeasablivym testam, sacyjalnym zandažom pierad vybarami ŭ Bundestah, jakija naležyć pravieści ŭvosień hetaha hoda.
Što ž pakazali vybary ŭ Saary? Pierš-napierš davoli vialikuju palityčnuju aktyŭnaść hramadzian. Na vybarčyja ŭčastki pryjšli amal 70 pracentaŭ vybarščykaŭ (69,7).
Druhoje. Źnikła z areny Partyja pirataŭ, jakaja hučna zajaviła pra siabie na minułych vybarach. Jana nabrała mizerny pracent hałasoŭ i ciapier niemaje svaich pradstaŭnikoŭ u łandtahu.
Treciaje. Pravapapulisckaja partyja «Alternatyva dla Niamieččyny» stała parłamienckaj voś užo ŭ 11-aj fiederalnaj ziamli (usiaho ziemlaŭ šasnaccać). Praŭda, «Altenatyva» nie dasiahuła takich vynikaŭ, jak letaś u Badenie, Rajnłandzie, Saksonii-Anhalcie, Meklenburhu—Piaredniaj Pamieranii i Bierlinie, ale nabranyja 6,2% hałasoŭ dazvolili joj zaniać kresły ŭ jašče adnym łandtahu.
Čaćviortaje. Umacavała svaje pazicyi partyja Anhieły Merkiel — Chryścijanska-demakratyčny sajuz, jakich pravyja papulisty vinavacili ŭ niepradumanaj mihracyjnaj palitycy dy inšych prablemach Niamieččyny. Miž tym vybary ŭ Saary pakazali, što CHDS ciažka vybić ź siadła. Hetaja partyja ŭmacavała svaje pazicyi i nabrała CHDS 40,7 pracentaŭ hałasoŭ suprać 35,2 na papiarednich vybarach. Heta istotny pośpiech kansiervataraŭ.
Na hetym fonie vielmi kiepska hladziacca elektaralnyja vyniki Levaj partyi. Jana straciła bolš jak 3 pracenty hałasoŭ vybarščykaŭ (16,1 pracenta ŭ 2012 h. i 12,9 sioleta). Nahadaju, što mienavita hetaja partyja vielmi rezka krytykavała i «Alternatyvu dla Niamieččyny», i kabiniet Anhieły Merkiel.
Jašče horšyja vyniki vybaraŭ u Saary dla Partyi zialonych, jak. Jaje padtrymali tolki 4 adsotki vybarščykaŭ, i jana pazbaviłasia kresłaŭ u łandtahu. (Na papiarednich vybarach zialonyja nabrali taksama nie šmat — 5 pracentaŭ hałasoŭ, ale roŭna stolki, kab prajści ŭ ziamielny parłamient).
Sacyjał-demakraty, jak i zialonyja, taksama stracili 1 pracent padtrymki: 29,6 suprać 30,6 u 2012 hodzie. Zdavałasia b, niašmat, ale na fonie pośpiechu chadekaŭ i «Alternatyvy» heta paraza, asabliva kali uziać pad uvahu, što esdeki chočuć stać pieršaj partyjaj u krainie.
Mnohija ličyli, što pośpiech sacyjał-demakratam pryniasie charyzmatyčny kandydat na pasadu fiederalnaha kanclera Marcin Šulc, papularnaść u krainie vielmi vysokaja. Adnak, jak adznačyła «Süddeutche Zeitung», vyniki vybaraŭ u Saary pakazvajuć: Šulc-efiekt nie ŭzbahačvaje SDPH.
U samoj Sacyjał-demakratyčnaj partyi Hiermanii mnohija spadziajucca, što Šulc-efiekt nie ŭbahačvaje jaje pakul što i što da maja, a pahatoŭ da vosieni situacyja palepšycca.
