Kancler Aŭstryi Kryścijan Kiern maje namier napisać list u Jeŭrakamisiju z tłumačeńniem, čamu respublika nie choča ŭdzielničać u prahramie Jeŭrasajuza pa raźmierkavańni biežancaŭ. Pra heta paviedamlajuć infarmahienctvy sa spasyłkaj na APA.
Jak zajaviŭ Kiern paśla pasiadžeńnia kabinieta ministraŭ, Aŭstryja abaviazałasia pryniać z Hrecyi i Italii amal dźvie tysiačy biežancaŭ pa prahramie raźmierkavańnia ES, ale kraina i biez taho vykanała hetuju normu z-za patoku nielehalnaj mihracyi.
«My ličym, što dla Aŭstryi treba zrabić vyklučeńnie, tamu što my ŭžo vykanali svaje abaviazacielstvy. Hetaje pytańnie abmiarkujem ź Jeŭrapiejskaj kamisijaj i adpravim im list jak maha chutčej», — skazaŭ Kiern.
Raniej ministr abarony i sportu Aŭstryi Chans Pieter Daskocił zajaviŭ, što Viena pavinna vyjści z prahramy ES pa raźmiaščeńni biežancaŭ ź Blizkaha Uschodu i Afryki. Na dumku kiraŭnika viedamstva, respublika pieravykanała svoj płan u ramkach prahramy. «Ja liču, što Aŭstryja ŭžo ŭniesła dastatkovy humanitarny ŭkład», — skazaŭ ministr.
Ministr taksama źviarnuŭ uvahu, što za apošnija dva hady Aŭstryja pryniała bolšuju kolkaść zajaŭ na prytułak, čym Italija. Tak, u respublicy na 1 młn žycharoŭ pryjšłosia 4587 zajaŭ, a ŭ Italii ŭsiaho 1998 zajaŭ. Jon taksama paskardziŭsia, što ŭ 2015 hodzie rašeńnie ab raźmierkavańni biežancaŭ prymałasia pry ŭmovie zachavańnia salidarnaści i raŭnapraŭnych kvot na biežancaŭ u ramkach ES, ale nichto nie prytrymlivajecca hetaha pryncypu.
U 2016 hodzie mihracyjnaja słužba Aŭstryi dapuściła da pracedury razhladu zajaŭ na atrymańnie statusu biežanca amal 36 tysiač čałaviek. Uradam byŭ ustalavany limit u 37, 5 tysiačy zajaŭ, pry pieravyšeńni jakoha mierkavałasia zakryć miažu i pačać departacyju biežancaŭ pa sproščanaj pracedury. U ciapierašni čas ułady jeŭrapiejskich krain viaduć strohi kantrol na svaich miežach i zajmajucca vyrašeńniem pytańnia ab raźmierkavańni pamiž saboj biežancaŭ pa kvotach, ustanoŭlenych Jeŭrakamisijaj.
