Premjer-ministr RF Dźmitryj Miadźviedzieŭ upieršyniu adkazaŭ na padazreńni ŭ karupcyi, ahučanyja Fondam baraćby z karupcyjaj Alaksieja Navalnaha bolš za miesiac tamu.
AFP
«Kamu heta vyhadna? Heta vyhadna tym, chto zamaŭlaje padobnaha rodu siužety, materyjały. Heta, jak praviła, ludzi, u jakich jość całkam kankretnyja palityčnyja mety», — cytuje Miadźviedzieva ahienctva TASS.
Jon zajaviŭ, što za publikacyjaj kampramatu staić imknieńnie «vyciahnuć ludziej na vulicy», a sam materyjał nazvaŭ «łuchtoj i niejkimi papierkami» i paraŭnaŭ z kampotam.
«Biaruć tam usiakuju roznuju muć, łuchtu ŭsiakuju źbirajuć pra mianie, kali heta tyčycca mianie, pra maich znajomych ludziej, i pra ludziej, pra jakich ja naohuł nikoli nie čuŭ. Pra niejkija miescy, dzie ja byvaŭ. Pra niejkija miescy, pra jakija ja taksama nikoli nie čuŭ. Źbirajuć tam niejkija papierki, fatahrafii, adzieńnie. Potym stvarajuć taki pradukt i pradjaŭlajuć jaho», — skazaŭ Miadźviedzieŭ.
2 sakavika Fond baraćby z karupcyjaj apublikavaŭ rasśledavańnie «Jon vam nie Dzimon» ab majomaści i šmatlikich abjektach nieruchomaści, źviazanych ź Dźmitryjem Miadźviedzievym.
Jak śćviardžajecca ŭ rasśledavańni FBK, rasijski premjer vałodaje hetymi aktyvami, majučy mahčymaść kiravać imi praź sietku niekamiercyjnych fondaŭ, jakimi kirujuć jaho adnakurśniki.
Siarod takich aktyvaŭ fond Navalnaha vyjaviŭ vinahradniki ŭ italjanskaj Taskanie i jachtu, jakija farmalna naležać afšornaj kampanii. Pres-sakratarka rasijskaha premjera Natalla Cimakova ŭ adkaz zajaviła, što materyjał nosić jarka vyražany pieradvybarčy charaktar.
«Kamientavać prapahandysckija vypady apazicyjnaha i asudžanaha piersanaža, jaki zajaviŭ, što jon užo viadzie niejkuju pieradvybarčuju kampaniju i zmahajecca z uładaj, biessensoŭna», — skazała jana.
