Zabudziemsia na chvilinu na šmatlikija parušeńni, zafiksavanyja naziralnikami i žurnalistami, źviazanyja z zavyšanaj jaŭkaj, ukidam biuleteniaŭ i zakrytym padlikam hałasoŭ. Navat analiz abahulnienych aficyjnych źviestak stavić niazručnyja pytańni da arhanizataraŭ vybaraŭ.
Jak i ŭ historyi z vynikami prezidenckich vybaraŭ, na parłamienckich vybarach ź ličbami niesapraŭdnych biuleteniaŭ — taksama prablemy. Praŭda, inšaha rodu. U vynikach prezidenckich vybaraŭ vyrazna vyłučajecca Mahiloŭskaja vobłaść — u adroźnieńnie ad inšych rehijonaŭ krainy, tolki tut pa rajonach nie skača roźnica ŭ ličbach niesapraŭdnych biuleteniaŭ ad vybaraŭ da vybaraŭ.
A ŭ vynikach parłamienckich vybaraŭ 2016 hoda vydzialajecca statystyka pa Minsku.
Z aficyjnych dadzienych vynikaje, što minčuki čamuści radziej za žycharoŭ inšych rehijonaŭ krainy psujuć biuleteni i psujuć ich nadta nieraŭnamierna ad rajona da rajona.
Siaredniaja kolkaść niesapraŭdnych biuleteniaŭ pa 110 akruhach krainy (a ŭ ich kolkaść vybarcaŭ prykładna roŭnyja) skłała 597. Za vyklučeńniem minskich akruhaŭ, siaredni pakazčyk niesapraŭdnych biuleteniaŭ pa 90 inšych vybarčych akruhach krainy skłaŭ 664.
A pa minskich akruhach siaredni pakazčyk — usiaho 294, i ŭ troch ź ich niesapraŭdnych biuleteniaŭ naličyli mienš za sotniu, što stała absalutnym rekordam u krainie.
Moža, razhadka ŭ tym, što žychary stalicy mieniej krytyčnyja da dziejnaj ułady, čym biełarusy z rehijonaŭ, a značyć, im i mieniej racyi psavać biuleteni ŭ jakaści sacyjalnaha pratestu? Dy nie, sacyjałahičnyja dadzienyja havorać, chutčej, pra advarotnaje: u Minsku bolš pratestnaha elektaratu, čym u rehijonach.
Moža, minčuki ŭ siarednim maładziejšyja i/abo z bolš vysokim uzroŭniem adukacyi, a tamu i radziej pamyłkova abo praź niaŭvažlivaść psujuć biuleteni? Ale z aficyjnych vynikaŭ vybaraŭ nie vidać tendencyi, kali b dola niesapraŭdnych biuleteniaŭ u akruhach z bolšaj dolaj sielskaha nasielnictva była stabilna bolšaj, čym u rajonach z bolšaj dolaj haradskich žycharoŭ.
Adsiul vidavočnaja prablema z aficyjnymi dadzienymi ŭ tym ci inšym vyhladzie. Dy i pa vynikach vybaraŭ-2012 minčuki psavali biuleteni amal udvaja čaściej, čym u 2016-m.
Status samaha «spraŭnaha» mikrarajona na vybarach-2016 dastaŭsia Uručču. Usiaho 54 niesapraŭdnyja biuleteni pa Uruckaj akruzie (u 2012 hodzie było 733) na 45.570 čałaviek, što prahałasavali. Dla paraŭnańnia, u susiedniaj Partyzanskaj akruzie na 40 tysiač biuleteniaŭ pryjšłosia amal paŭtysiačy niesapraŭdnych.
Kolkaść niesapraŭdnych biuleteniaŭ pa akruhach na 1000 minčukoŭ, što prahałasavali
Takim čynam, pavodle aficyjnych dadzienych, pa niekatorych akruhach Minska na 1000 tych, chto prahałasavaŭ, prypadaje tolki 1—2 niesapraŭdnyja biuleteni, a ŭ susiednich — u piać-dziesiać razoŭ bolš. Padobnyja razychodžańni majucca jašče i ŭ Homieli.
Krynica aficyjnych dadzienych pa vybarach-2016: sajt CVK, dublikat.
