 |
Raspaŭsiudžany mif pra toje, što apazycyja strašna adarvanaja ad narodu całkam asprečvaje svaim prykładam hłybačanin Jarasłaŭ Biernikovič. Užo za pieršyja try dni pracy inicyjatyŭnaja hrupa lidera nacyjanalnaha koła z Hłybokaha sabrała tysiaču podpisaŭ. Usia kampanija prachodzić vyklučna na biełaruskaj movie.
«Dla mianie samoha taki paśpiachovy pačatak kampanii byŭ šokam, — dzielicca ŭražańniami Jarasłaŭ. — Zhadvaju, što navat padčas prezydenckich vybaraŭ my źbirali za Domaša i Milinkieviča ŭ lepšym vypadku 1300—1500 podpisaŭ za miesiac. A sioleta voś takaja aktyŭnaść».
U inicyjatyŭnuju hrupu Jarasłava Biernikoviča ŭvachodziać 28 čałaviek, chacia, pa pryznańni samoha aktyvista, podpisy źbirajuć daloka nia ŭsie. Dyj z troch rajonnych centraŭ vybarčaje akruhi — Hłybokaha, Dokšyc, Vušačy — aktyŭnaja praca viadziecca tolki ŭ Hłybokim.
U Vušaču paśla šostaj viečara pryjaždžajuć siabry inicyjatyŭnaj hrupy z Navapołacku. Chočuć vystavić pikiet i ŭ Dokšycach. Na siońniašni dzień za patencyjnaha kandydata na mandat u Pałacie pradstaŭnikoŭ sabrana kala 3600 podpisaŭ — najlepšy vynik u krainie. Kandydaty‑łukašenkaŭcy daloka adstajuć.
«Heta ŭžo nia pieršaja maja vybarčaja kampanija, ale takaja zyčlivaść i spahada z boku ludziej nazirajecca ŭpieršyniu. Padčas abychodu kvater amal kožny imkniecca vykazać svaju padtrymku», — praciahvaje Ja.Biernikovič.
Aktyvist užo balatavaŭsia na parlamenckich vybarach u 2004 hodzie. Pieršapačatkova jaho kandydaturu CVK nie zarehistravaŭ, bo Biernikovič nie paznačyŭ hanararu za publikacyju ŭ časopisie ŭ pamiery 2 tysiač rubloŭ. Na hetym kandydat ad Demakratyčnych siłaŭ ruk nia skłaŭ, i damohsia taki rehistracyi. Pavodle jarmošynskich źviestak, Biernikovič na tych vybarach nabraŭ kala 10% hałasoŭ i zaniaŭ druhoje miesca, sastupiŭšy Vasilu Chrołu.
Sioleta ŭ Jarasłava Biernikoviča supiernik na vybarach ad ułady — staršynia Viciebskaha abłvykankamu Viktar Andrejčanka. «U mianie časta pytajucca, čamu Andrejčanka idzie mienavita pa Hłybockaj akruzie? Adkazvaju na heta, što mnie šukali hodnaha kankurenta», — žartuje Biernikovič.
Pry kancy pytajusia, ci jość spadziavańni, što moža pieramahčy ŭ akruzie. «Usiakaje byvaje. Kab nie spadziavaŭsia, to i nie išoŭ by», — adkazvaje Jarasłaŭ.
Źmicier Pankaviec
Jarasłaŭ Biernikovič naradziŭsia ŭ 1966 hodzie ŭ vioscy Varancy (Hłyboččyna). Skončyŭ Babrujski sielskahaspadarčy technikum. Słužyŭ na Dalokim Uschodzie (1987—1993). Pracavaŭ na roznych pasadach u Hłybokim. U Partyi BNF ad 1999 hodu.
Hladzi jašče:
Pavał Sieviaryniec: «Čym heta pachnie».
Kamentar redakcyi. Pra Biernikoviča, vybary i «niazdolnuju» elitu.
