Lidara «Maładoha fronta» Źmitra Daškieviča niečakana vyzvalili ź SIZA pad padpisku ab niavyjeździe. Daškieviča abvinavačvali ŭ padrychtoŭcy masavych biesparadkaŭ šlacham stvareńnia patryjatyčnaha kłuba «Vajar», jaki dziaržaŭnyja ŚMI vydavali za «ŭzbrojenaje farmiravańnie».
35-hadovy Daškievič užo treci raz apynuŭsia ŭ turmie pa palityčnych matyvach. Doma jaho čakali žonka Nasta i dvoje małych dziaciej, Mara i Davyd.
Daškievič trymaje nievialički biznes pa vyrabie mebli, jahonaja kampanija nazyvajecca «Cieślary». Jon taksama aktyŭna zajmajecca hramadskaj dziejnaściu.
Litaralna praz hadzinu paśla vyzvaleńnia jon daŭ doma pres-kanfierencyju, jakaja tranślavałasia anłajn u fejsbuku. Na joj jon nazvaŭ abvinavačvańni na adras siabie i svaich siabroŭ absalutna nadumanymi, «ja zarahataŭ, kali pračytaŭ ich». Jon taksama paabiacaŭ praciahnuć zmahańnie za hramadzianskija i nacyjanalnyja pravy biełarusaŭ.
Pieršaje sełfi na svabodzie.
Źmicier Daškievič byŭ zatrymany 21 sakavika na pracoŭnym miescy. Jon adzin z 35 čałaviek, jakija prachodziać pa tak zvanaj «Spravie patryjotaŭ», pa jakoj zatrymali ludziej, patencyjna zdolnych uznačalić vuličnuju demanstracyju 25 Sakavika. Daškievič byŭ siarod tych 17 čałaviek, kamu było vystaŭlenaje kryminalnaje abvinavačvańnie.
Ź jaho kvatery byli skanfiskavanyja 17 nacyjanalnych ściahoŭ, banier z Pahoniaj i kamuflažnaja vopratka. Jaho abvinavačvali ŭ padrychtoŭcy masavych biesparadkaŭ z 2011 hoda, niahledziačy na toje, što jon da 2013 hoda adsiedžvaŭ papiaredni termin źniavoleńnia.
Źmicier Daškievič kaža, što ŭ źniavoleńni admoviŭsia davać pakazańni.
Heta była treciaja pasadka Źmitra Daškieviča pa palityčnych matyvach.
* * *
Paźniej stała viadoma, što vyzvaleny taksama paplečnik Daškieviča Siarhiej Palčeŭski.
Budzie abnaŭlacca.
