Supracoŭniki milicyi Asipovičaŭ raspačali kryminalnuju spravu suprać aktyvista niezarehistravanaj arhanizacyi «Małady front» Arcioma Dubskaha.
Chłopca padazrajuć u machlarstvie. Arciom ličyć, što kryminalnuju spravu suprać jaho zaviali z metaj realnaha pazbaŭleńnia voli apazycyjanera, jaki pakarany abmiežavańniem voli ŭ tak zvanaj «spravie 14-ci». Arciom moža papoŭnić śpis palitviaźniaŭ, jakija adbyvajuć pakarańni ŭ turmach.
Arciom Dubski paviedamiŭ, što jamu šmat čaho niezrazumieła ŭ kryminalnaj spravie, jakuju raspačali asipovickija milicyjanty pavodle machlarstva. 1 žniŭnia jaho vyklikali śledčyja na dopyt i adrazu paśla hetaha na 72 hadziny nakiravali ŭ izalatar. Ale paśla pryjezdu advakatki Arcioma Śviatłany Harbatok chłopca vypuścili raniej paznačanaha terminu.
Arciom raspavioŭ, što ŭ kryminalnaj spravie jość paciarpiełaja žančyna, jakaja źviarnułasia ŭ milicyju paśla taho, jak na jaje rachunku za mabilny telefon źjaviłasia pazyka bolš za 5 miljonaŭ rubloŭ. Žančyna kazała, što zhubiła sim-kartku ad svajho telefona jašče ŭ traŭni. Praź miesiac kampanija «Velcom» zapatrabavała, kab jana zapłaciła hrošy.
Arciom apavioŭ, što jahony znajomy braŭ u jaho telefon na adzin dzień. Mienavita ŭ hety dzień praz mabilny telefon, u jaki niekalki razoŭ staviłasia zhublenaja žančynaj sim-kartka, byŭ zrobleny vychad u internet na 3 hadziny.
Śledčyja zabrali kamputar u pastara Ernesta Sabiły, bo, pavodle ich mierkavańniaŭ, vykarystoŭvaŭsia mienavita hety kamputar.
Havoryć Arciom Dubski: «Dla mianie vielmi dziŭnymi padajucca niekalki faktaŭ.Naprykład, toje, što «Velcom», jaki vielmi dobra moža ličyć svaje hrošy i zvyčajna blakuje svaich abanentaŭ, kali minus dźvie ci try tysiačy rubloŭ, nie zrabiŭ hetaha pry takim vielizarnym minusie na rachunku. Pa-druhoje, čamu tuju ž sim-kartku, jakuju stracili jašče ŭ krasaviku, tolki ciapier pačali šukać i tolki ciapier znajšli čałavieka. Technična heta było vielmi prosta zrabić».
Cikava, što chłopiec, jaki ŭ toj dzień byŭ z telefonam Arcioma, prachodzić u spravie jak śviedka.
Arciom daŭ padpisku pra niavyjezd.